猴年啱啱開波，正當全港市民重熱烈討論緊新界特首劉皇發喺車公廟求嗰支籤到底講乜，市面經已傳來一啲消息，例如：玩具廠東主生意好，派利是八千元，同埋廉署行動組人員因為壓力太大，自動降職，減薪六成。
玩具廠老闆派利是八千元，係因為美國經濟復甦，美國市場定單增加。所以八方喺一月一日，新年許願，第一個願望就係美國繼續保持超強地位，令香港有多啲生意做，美國好，香港好，香港好，咁就即是美國好。八方嘅願望，開年豬紅，即時見功。
至於廉署行動組探員嫌工作壓力大，咁就唔知點解。廉署掃蕩貪污，不嬲只係掃本港範圍嘅低下層，陳裘大、冼錦華佢就敢拉，賴昌星、王雪冰、朱小華呢批幕後有中南海後台嘅，由於涉及國家「內政」、軍事機密，一向都毋須廉署插手干預，點解要搞到要自願降職減人工咁慘？
講到工作壓力，唔知點解，立法會班婦女議員，可能壓力大得滯，竟然除吳靄儀之外，全女班準備齊齊向北望，模仿大陸嗰個「女子十二樂坊」，粉墨登場，玩揚琴、拉二胡。組織一個「立法會女子十二樂坊」，娛樂吓大家！
女子十二樂坊，其衣着、打扮、脂粉，帶有一股強烈嘅東洋味，立法會女議員，竟然好學唔學，成班女議員開年柴娃娃，只有一個吳靄儀唔夾band，寧願返屋企焗英式scone包仔。梗係喇，瑪嘉烈．吳曾經遊學劍橋、留學美國波士頓，英文流利，係國際文明社會級嘅精英，一定唔鍾意企喺度拉二胡。
傳真︰2623-9278
電郵︰