銀行利率屢創新低，𢭃埋𢭃埋啲利是即使存入戶口都係得個「桔」，與其畀大商家拎去投資，不如自己儲起。市面推出了好多得意趣致的錢罌，唔止幫你儲錢，重可以玩埋一份。有日唔記得入錢部機就會「鬼殺咁噪」，玩味性十足！
記者：何善華
攝影：伍慶泉
Model：Muffet（SunSpot）
自問自覺性較低，成日想儲錢都唔成功的話，這個太空人機械錢箱絕對適合你。設定好儲錢目標和完成日期，即使有日唔記得入錢，機械人都會用極刺耳的響聲提醒你，叫你記得定時定候餵飽佢。有埋時間、響鬧功能，雙手曉自動郁動，全身Cyber設計，入錢位就喺機械人的頭頂。
呢款用機場運輸帶做主題的錢箱，放入硬幣在運輸帶上，只要按個紅色啟動掣，整條運輸帶就會自動運行，而硬幣亦會慢慢推入箱內，非常好玩，只需兩枚AA電芯即可。
這個汽車手柄型的錢箱仔，按下手柄錢箱的發聲掣就會有古靈精怪的響聲，可謂玩多過儲錢用途。手柄位後面有個藍色掣，想取錢一按OK，認真搞鬼。
粉紅色吉蒂貓就住喺車屋內，只要放個硬幣在門口，按一吓門前地下的掣，吉蒂貓就會連人帶車衝出來「搶」錢，動作極快。門側有個上鏈位，記住唔好上得太多，否則會好易弄壞。
唔單止廢物要分類，硬幣同樣要分開處理，如果只係想儲些毫子的話，這個體積有限的小錢箱就啱晒你。得意蛋內有隻小鴨仔玩具，上鏈後就會自己跳，返工返學前拎散銀搭車，放喺屋企門口最就手。
黃色BigBird卡通公仔夠晒經典，拆咗個頭後原來內裏有兩包餅乾，可以食完後先開始慢慢儲錢。入錢位原本是密封的，必須要用𠝹刀切開方可入錢，放在小朋友書桌美觀又實用。
表面上呢隻Monchhichi係一個普通公仔，實際上佢係一個小型錢箱。招牌式啜奶樽動作，𠱁得小朋友唔買都唔得啦！
唔記得自己儲咗幾多錢？呢部有埋計算機功能的的士咪表造型錢箱，可以幫你計埋條數，等你可以即時知道自己的儲蓄成績有幾好。咪表旁有個對講機，一提起就會有聲響，提醒你「上車」要入錢呀！
（a）JCSHOP（31022783） 地址：銅鑼灣時代廣場833號舖
（b）崇光百貨（28338338）
（c）SanrioGiftGate（31944621） 地址：將軍澳新都城二期千色店二樓
