恭喜恭喜！大家新春愉快嗎？轉眼間聽日又係打工仔們開工之大日子。猴年首日開工咁大件事，梗係要搵風水師傅指點一下，等大家開工大吉工作順利，雖然理性上曾叫自己唔使搞咁多嘢，但今次搵到呢期最紅嘅蘇民峰師傅，當然要即刻睇完，然後再跟住做到足啦！
記者：張銘恩 攝影：陳陶鈞
鳴謝：蘇民峰玄學顧問 模特兒：Fa（SunSpot）
服裝提供：Easy
大家聽日最好預早點時間開工，因為先行個大運會令今年工作更加順利。而行大運之方向則由自己屋企計起，如果你住旺角，想頭腦好啲的話就要向南行，即係向尖沙嘴方向行，行一個街口便可。不過千祈唔好貪心，只可揀定一方，冇得博大霧㗎。
文職人士：搵啱吉祥物事半功倍
想由頭旺到落腳，大家不妨跟足蘇師傅講，返工時隨身帶住有利自己嘅吉祥物。以下提供之吉祥物條件有二，兩個條件齊備當然最好，但只要具備其中一項亦可收得興旺之效。
明日財位於東南方，去年冇乜財運嘅你，想加薪或賺多啲，一出門口記住向東南方行一段路先。
吉祥物：東南屬木，宜帶青綠色、長形物件
水晶手機繩
Swarovski長條形青綠色手機繩，兩個條件中晒，勁旺！
正所謂好馬都需有伯樂扶持，希望事業得貴人扶助，返工前就要先向正北方行，易得吉星高照，工作更加得心應手。
吉祥物：正北屬水，宜帶黑、灰、藍色或波浪形物件
波浪飾物
波浪形吊墜連頸鏈，可選擇埋波浪形戒指襯埋一套。
藍色手表啱男士
男士不妨戴隻藍色手表加強貴人運，呢款由TomEverhart操刀嘅Snoopy油畫款手表都唔錯。
文昌位有利文人，所以從事文職之人就要向南行個大運先返公司，咁做嘢就頭腦靈活、精神爽利，老細問問題都即時對答如流！
吉祥物：正南屬火，宜帶紅、橙、紫色或尖形物件
自選尖頭鞋
冇玩你，真係尖頭鞋都得，防水人手繪圖小木偶尖頭布鞋，可自選圖畫及顏色。
小王子衞衣
唔鍾意着尖頭鞋，又搵唔到尖形物件的話，亦可選擇紅、橙或紫色衫。
而從事文職以外的人，開工前就可以向西方武曲位走一走，會有利升職，所指文職以外之職業包括安裝電腦、三行等等技術人員。不過白領們則要盡量避免向西面行，事關當日正西亦是嗌交位，易生爭執，文人避之則吉。
吉祥物：正西屬金，宜帶白、金、銀色或圓形物件。
Snoopy手機繩
圓形Snoopy金屬手機繩，實用美觀，又有齊吉祥物具備的條件。
今年八白財星於東北位，乃猴年的正財位，老細們想公司賺大錢財源滾滾來，就要放一杯水或魚缸在公司嘅東北位催財喇！
意頭魚缸
要催財加裝飾品一物二用，可以買個「五福臨門」魚缸仔，乾濕電兩用非常方便，插電後金魚仔活潑地游來游去，夠晒好意頭又有生氣。
從事推銷員、保險等須要應酬的朋友就應該催旺桃花，因為桃花並不等於男女關係，一般人際關係也與桃花運勢有關。所以想催旺人緣的話，就要於公司北面桃花位放上一個金屬音樂盒及一杯水，而且要不時拉動音樂盒，令其聲音震動旁邊的水，咁就零舍受客人歡迎，見都見你先！
東南面乃今年的文昌位，對文職及進修朋友有利，宜放四支水種植物於東南位有催旺作用。開運竹、富貴竹等均可，另外如要訂立契約或處理文件，催旺文昌亦能起正面作用。
九支紅花助升職
而今年九紫喜慶星剛好移到南方，白領們想有升職等喜慶事發生，不妨於南位放盆泥種植物（仙人掌除外），又或者九支紅花都得。
今年西南面乃偏財位，特別有利從事經紀、股票買賣之人士。蘇師傅話想今年賺大錢，記住第一件事要坐喺西南方開兩張單，起個好頭咁話，如果自己位地方淺窄，將PatPat扭向西南面開單一樣得喎！
對於從事體力勞動等技術人員，由於今年六白武曲星移至西北位，渴望升職的話，可於此方放八粒石頭；而若想加人工的話，就可於上述方位放一杯水，有利財源廣進。
八粒石頭
文職以外嘅人想升職可放八粒天然白色石頭於西北面。
今日蘇師傅教大家嘅猴年開運法，放諸四海皆可。所以無論你係北上工作人士，抑或好似吳宇森咁喺荷李活拍緊電影，都一樣照跟就冇走寶！
雖然初五並非吉日，但因大部份打工仔要於明日開工，所以最緊要揀啱吉時。
吉時：7:00am?1:00am、5:00pm?:00pm、9:00pm?1:00pm
由於初五屬龍，而龍沖狗，所以屬狗之人明日出門之前，可於西南或東北位擺放一個音樂盒化解，然後再行大運，咁就冇晒問題。
對於未有工做嘅朋友，蘇民峰師傅亦有辦法醒兩招畀各位催旺一下，搵份好工。方法又平又簡單，道具都唔使買，而且冇公司唔緊要，喺屋企擺都一樣得。
能催旺人緣，人哋睇你更順眼，見工時更得老細歡心。
東北生財位再放一杯水，有人緣加上有財運，即刻有工返！
正東屬三碧嗌交爭吵位，唔想動不動就與同事或客人甚至老細有爭執，記住放樣粉紅色物件於東位，化解戾氣。不過若你係靠把口為生，如DJ或好似蘇師傅咁，就毋須化解。
若想猴年健健康康請少啲假，就要放個音樂盒於正中間位置，化解中宮五黃大病位。若冇音樂盒的話，亦可放置任何可發聲嘅金屬物件如舊鎖匙，不過記住要多過一條。
7-11（22991386）各大7-11便利店
奇跡（82029121）旺角家樂商場F22舖
ZORIS（97547101）旺角兆萬中心1樓189舖
玄機風水城（27713978）旺角信和中心14樓01室
C.Gift（23328593）旺角家樂商場1樓18A舖
DIM:E（27716987）旺角家樂商場G07B舖