被指精神有問題的藍潔瑛，昨日凌晨在西貢寓所懷疑自殺，與藍潔瑛交情甚篤的林建明，認為藍潔瑛現時最需要別人關心，由於大姐明亦曾患抑鬱焦慮症，所以她準備以過來人身份幫助抑鬱症患者，回饋社會。
近年被指精神及情緒出現問題的藍潔瑛，昨日年初三凌晨時分在西貢寓所發生懷疑自殺事件，與藍潔瑛交情十分要好的林建明，昨午在尖沙嘴思家菜出席新春團拜時，得悉藍潔瑛企圖自殺後無奈地說：「呢幾年我同佢一齊，我有叫過佢食藥，但佢唔肯食，早幾日我都有打電話叫佢嚟團拜㗎，但佢精神好差，拎起個電話唔講嘢！」
大姐明○一年主持完亞視節目後離開錄影廠時，不慎被布景板擊中頭部，及後更因該次意外而引發抑鬱焦慮症，去年底大姐明入稟法院，向亞視追討約三千萬港元賠償。問大姐明藍潔瑛是否與她一樣患有抑鬱焦慮症時，大姐明不置可否的說：「我唔可以代佢講，始終係佢私人嘢，但佢嘅情況係需要有人關心，要睇醫生同食藥，過埋今日我會打電話畀佢。」據悉大姐明曾介紹專科醫生給藍潔瑛治病，但她對此未肯多講半句。
備受抑鬱焦慮症困擾的大姐明自言已康復得八八九九，並有意幫助受抑鬱症困擾的人士，大姐明說：「有呢種病嘅人其實唔到自己控制，係俾個病控制，就好似張國榮咁，其實唔係自殺，係『他殺』，俾個病謀殺。呢類人係好需要有人關心，遲啲我會做義務工作，成立一個會去幫助佢哋，回饋社會。」
早前容錦昌企圖燒炭自殺，而蔡楓華亦與藍潔瑛一樣被指精神有問題，大姐明會否向他們施以援手？大姐明表示患有抑鬱症的人士往往不肯面對現實，所以她在防抑鬱會成立後，會逐一跟容錦昌等人聯絡。近年娛樂圈不少人患上抑鬱症，而大姐明認為不止娛樂圈，就連整個社會近年患抑鬱症的個案亦大大增加，她說：「其實呢種病唔單止靠食藥，多做運動都會有幫助，好似我咁，除咗食藥之外，又做運動又學英文，生活好充實。」
大姐明去年曾因病而不想見人，直至近日病情好轉，便決定舉行團拜與好友及契仔契孫共聚，席間大姐明大派過「百萬」元利是給在場親友，包括文頌嫻、惠英紅、姚嘉妮和林祖輝等。
不過大姐明所派的利是，是包括越南、印尼、菲律賓、新加坡、中國、英國、美國、加拿大、瑞士和香港等十多個不同國家和地方的貨幣，所以加起來的數字才如此驚人。大姐明笑說：「我以前旅行剩低好多散紙，咁咪攞出嚟畀大家玩抽利是開心吓囉！」
採訪：戴彩煥
攝影：戴彩煥、娛樂突發組
