猴年首次同各位見面，伏勝第一句想講嘅話就係「恭喜發財」，皆因港股嘅興旺，某程度上係依靠各大小散戶投資者維持，所以各位發財，對伏勝嚟講都係件好事。
港股喺上周四、周五休戰咗兩日，喺外圍市無乜利淡消息傳出下，伏勝相信紅盤高開嘅機會好大。伏勝已經準備好足夠銀両，準備要幹一番大事，伏勝喺年卅收市後無即時收爐，反而加緊秣馬厲兵，周圍收料希望喺初五開市日揀番隻好股，攞個頭彩誓要贏足1年。
新年前港股完全係地產股天下，之前有大行推介幾隻地產股，話佢哋喺本港樓市復甦下受惠最多，加埋各大小地產商喺新年期間封盤，務求要谷起成個地產市道，所以地產股喺新年後可能重會有一段時間當炒。不過要靠地產股嚟撐起個市，就真係唔知重得唔得，班大戶朋友話地產股仍然係可以小賭怡情，所以大家喺新年後不妨留意吓。
之前曾話過有世界級啤酒企業入股嘅粵海啤酒（124），有朋友話要留意番吓，佢哋雖然延遲咗公布細節嘅時間，主要原因係成單交易所涉及嘅銀両唔細，加埋入股嘅股東來頭唔小，延遲咗都唔出奇。不過管理層福星高照，聽講話唔使等到今個月31日先可以公布，最快分分鐘喺初五就掂，伏勝重聽到班手痕咗好幾個星期嘅大戶已經按捺不住，話隻股公布好消息嘅日子，就係開啤酒慶祝嘅日子，所以叫伏勝要買就趁手。睇番隻股上日個價，走勢仍然係橫行，不過已經貼近啲平均線水平，要開車嘅話，分分鐘可以見到2.2元。
伏勝