女子組合Cookies噚日去咗屯門表演，同歌迷慶祝新年。但前晚佢哋喺尖沙嘴出席簽唱會時就遲大到。當晚因為有煙花滙演，所以尖沙嘴附近封路，大會通知記者要早啲到場，但Cookies身為表演嘉賓反而唔準時，遲咗接近成個鐘先到場。
歌迷則為咗見偶像一面，一早去到霸頭位，前晚氣溫再急降，加上落住毛毛雨，歌迷們都等到好辛苦。不過Cookies嚟到都有同佢哋道歉話：「我哋之前返咗公司化妝，點知坐車過嚟時封路有阻滯。」問Cookies唔怕歌迷等候時凍到肺炎？成員Miki話：「我諗佢哋會着夠衫。」
對於猴年第一個工作就遲大到，Miki話：「我哋未試過做過年騷，下次會預鬆啲時間，我今年都有派利是畀工作人員，每人兩封，但覺得好奇怪，之前都係問媽咪換新銀紙。」
至於另一位成員Theresa近排工作好忙，佢試過攰到返屋企將洗頭水當做洗臉用品，洗到一半先知道，認真烏龍。
二人女子組合Twins早排接受顏聯武訪問，講吓入行後嘅辛苦事，例如放幾日假當大假，狂買衫減壓咁。其中成員蔡卓妍重提第一次做模特兒時，收到三千蚊人工，之後借咗畀女朋友買手提電話，最終冇還錢重搶埋佢嘅男友，名副其實「人財兩失」。
噚日年初三喺沙田舉行嘅賀歲馬賽事，唔少名人馬主都有入場試試手氣，好似陳祖澤、王晶同司馬燕等，其中郭秀雲同夫婿、鋼鐵大王後人龐傑一齊到場，不過一如往常，佢哋一見記者影相就即時彈開，快步入場。其實佢兩個結咗婚已經係半公開嘅事，唔使咁避忌啫！
葉蘊儀嘅生日同農曆新年好近，早排佢搞咗個生日派對，成班師弟妹好似陳山聰、唐寧、梁慧嘉等同佢大玩特玩，不過個個都冇時間買生日禮物，改封現金畀葉蘊儀做賀禮，令佢未過年已先發財。
黃夏蕙噚日入沙田馬場賭賀歲馬，一個鐘頭後佢就話發咗新年財，頭場贏咗幾萬元，見好即收嗱嗱臨走人。夏蕙姨重將啲銀紙貼住塊面博影相，不過都係一百元、二十元紙幣，金牛都冇張。舊年夏蕙姨爭上頭炷香，被電視影到甩假髮，佢話今年都有去，不過大家見佢唔到啫。
