於農曆大年初四，音公報上上下下……
祝董建華來年夏天日日潛水，冬天退隱深山，六百萬減了一等於香港社會又回復生機。
祝梁愛詩來年在髮型師大賽中勝出，幫人人頭上剪個靚髮型，好過幫人人頭上插把刀。
祝蕭蔚雲來年發財，扮廣告明星始終好過扮法律專家，賣廣告嘅產品當然係國內嘅黃色口水巾。
祝唐英年來年唔再做一刀切大俠，因為香港唔使再俾佢切，唐可做其「唔使切大俠」。
祝曾蔭權來年上京上得轟轟烈烈，就算死都死得有氣節，香港人為你立個氣節牌坊，封其做「節男」。
祝李國章來年打爆機，咁咪唔使再打。
祝林瑞麟來年臉皮厚道精精日上，做其真正的香港電台，那個假的香港電台就可繼續播啲低級趣味。
祝鄔維庸來年唔好再自我失憶，不如有老人癡呆好。
祝王敏剛來年學業進步，特別係嗰科統計學入門，咁大個人連民意調查係乜都唔識，重要出來獻醜，真係幾影響市容。
祝民建聯來年得最佳演技獎及最真情流露獎，最佳演技獎是在立法會選舉前應得的，而最真情流露獎是在立法會選舉後，變回大聲夾冇準與民為敵的真情演出應得的。
祝香港人來年買嘢諗都唔使諗，更加睇唔起講價！
祝香港來年「港泰民安」。唔好話國泰民安，小心俾啲專家話港獨！
祝音公報讀者來年開開心心，平平安安！