「梁振英做特首，我一定走人。」講呢句說話嘅今次唔係賭王何鴻燊，而係何生老友雲大棉。
雲老呢位老愛國一直對梁振英冇好感，佢幾乎係第一個喺九七之後，企出嚟狠批八萬五嘅人，重指名道姓話係行會成員梁振英嘅傑作，害死好多人。
八方問雲老，賭王點解咁勇？佢話何鴻燊唔信梁振英，佢十分認同，如果梁做特首，真係有一半人會走佬移民，包括雲老自己。
雖然雲老對老董都好不滿，但係相比於振英，佢情願支持老懵董做埋落去，所以話，如果下次大嚿陳偉業再喺立法會叫老董下台，老董應該知點答，咪話「好咯我下台咯，咪由梁振英接手囉」，睇怕大嚿會立即收聲。
雲老話猴年春節唔會外出，一於留港消費；佢最鍾意同八方講喺大陸山區同貧困地區嘅建校情況，到目前為止，已經起咗一百一十間，真係唔簡單。
做實事好過要虛名，雲老冇再被委任做全國政協，係中共嘅損失。
傳真︰2623-9278
電郵︰