名導演吳宇森在荷李活舉足輕重，巨星如湯告魯斯及班亞弗力等面對他時，均聽教聽話。但原來這位大導每天收工回家，竟第一時間衝入廚房，煮幾味小菜紓壓。
吳宇森是成功躍登荷李活權力榜的華人導演，合作演員粒粒巨星，如湯告魯斯（TomCruise）、影帝尼古拉斯基治（NicolasCage）及尊特拉華達（JohnTravolta）等。雖然眾星在荷李活舉足輕重，但在吳大導面前卻聽教聽話，背後全靠一部部的賣座好戲。
吳宇森成功背後卻有一股非比尋常的壓力，一般人會做運動或看書紓壓，吳宇森卻喜歡拿起鑊鏟，煮一頓豐富的美食來放鬆心情。
周潤發○一年到美國出席奧斯卡頒獎禮時，曾順道跟合作多年的老友吳宇森炮製了一頓豐富的午餐。吳宇森視烹飪為心靈雞湯，他說：「喺美國拍戲，雖然每星期只開五日工，但事前同製片、監製不斷開會，開鏡後又要趕進度，計預算。面對過億美元嘅投資，每步都要小心計算，壓力好大。我經常同自己講，點都好，千祈唔好將工作情緒帶返屋企，所以每次收工返屋企，第一件事就會衝入廚房煮嘢減壓。」吳宇森笑言做菜的時候，全副精神集中在柴、米、油、鹽當中，完全不用思考，整個人亦變得輕鬆。
吳宇森自言天生愛思考，他說：「思考係創作嘅原動力，因為諗得太過入神，所以我到𠵱家都唔敢揸車，因為會好危險。咪睇我成日拍動作片，其實我本身反應比較慢，好多事想得切、做唔切，為人為己都係做乘客好啲。」
平時吳宇森的太太除充當柴可夫外，更是一家人溝通的橋樑，吳宇森承認成功的背後，太太出了不少力，他感慨地說：「當年喺香港拍戲，一開工就日夜顛倒，莫講話同仔女溝通，就算連瞓嘅時間都冇，佢哋開始懂事，十幾歲最需要父愛嘅時候得唔到，覺得俾人忽略，漸漸產生疏離，所以嗰陣時佢哋對我有好大嘅怨恨。」
當時吳宇森雖已薄有名氣，但子女沒有因為父親而驕傲，反而覺得電影搶走了他們應有的父愛。
吳宇森說：「嗰段時期全靠老婆居中調停，不停同我講好話，事情先至冇去到一發不可收拾嘅地步，我同老婆傾，長此落去都唔係辦法，咁啱荷李活向我招手，我同老婆商量過，轉換咗工作環境，喺完善嘅工作制度下，應該會有多啲時間陪屋企人，情況會好啲。」
在荷李活，一星期只需工作五天，吳宇森閒時便下廚，與家人敍天倫。子女們現亦懂體諒父親的辛勞，他自豪地說：「𠵱家個大女阿Ann重幫手處理我嘅電影工作，做咗我助手。」
採訪：何永寧
攝影：陳慧安