歷年嚟慣例，農曆新年期間都係冇乜新碟出！今年就好啲，未過年前好多DVD發行公司都好識做咁，出定啲碟等大家好過年；𠵱家碟場內人氣最旺猛片，首數係被譽為英國30年來最佳恐怖電影《28日後》，而今期黑馬重有隻《三步殺人曲》嘅第三集《殺手攻略》。
記者、攝影：朱崇德
《28日後》喺舊年都曾經上過香港戲院，當時票房反應都相當唔錯；不過今次DVD碟最大賣點，係將原本113分鐘戲院版（IIB），重新經電檢署審批，並Upgrade做150分鐘嘅未經刪剪III完全版，想知佢點解被譽為英國30年來最佳恐怖電影，今次DVD版大家先可以見真章！
故事一開首講述一班活躍動物權益分子，闖入研究所釋放一批身染絕世病毒嘅猴子，由此種下禍根；病毒在第1日曝光、第3日全英各地已發生神秘性感染個案、第8日已經發展到向全球擴散、第20日英國發出緊急隔離令，第28日已經是生死存亡之秋！講真，香港人去年經過「沙士」一役，同最近亞洲各地發生的「H5N2禽流感」事件，大家睇此片時，真係有一種感到身受嘅切膚感覺！
而這個危機四伏的「28日後」，主角亞占在倫敦深切治療中心，從昏迷中甦醒過來，不過可惜整座醫院，甚至整個倫敦已經空無一人，有如一座死城一樣！導演最成功之處，是將倫敦大橋及西敏寺一類為人熟悉的地標，也設置到渺無人迹，頭幾幕的感染力，完全將人性最脆弱的無助感覺推到極致！
及後亞占去到一間自己熟悉的教堂，不過竟然發現屍橫遍野，而未死去的人則對他目露兇光，並想置他於死地！追逐過程中，絕無僅有的正常人莎林同馬克營救被圍剿的亞占，亞占才恍然大悟，全城已被感染，他們唯一能夠做的就是保住自己的生命！
不過此片最令人反思者，不單是病毒的恐怖，而且人性在這種大時下的完全扭曲；這種會經由血液傳播的世紀病毒，受感染者只有20秒內還存人性，而生還者就要這樣踏着別人的屍體，甚至殺戮同伴，來求免於難！
及後故事講述亞占在曼徹斯特，遇上全英僅存的9名軍人，他們立心已不是怎樣救治這些受感染的同胞，相反他們用恐怖隔離政策，以射殺這些「活喪屍」為樂，希望在它們全餓死以後，從新建立一個新英國！盡情顯現人性在這種動盪時代的醜惡！
《三步殺人曲》（95年）可以話係電影中嘅經典，戲中「拉丁情人」安東尼奧的結他殺手造型無人不識！而這套殺手三部曲的最後一部《殺手攻略》（2003年），啱啱亦殺抵碟場！（92年第一集的《殺手悲歌》，並冇在香港上映）
開片第一個反應，係覺得安東尼奧真係Man咗好多，加埋墨西哥結他手造型，真係好有天涯槍客Feel！故事同第二集一樣，一開片就講佢個殺手老婆，俾當地一個軍閥殺了，原本一心諗住隱姓埋名，躲在小村裏做個樂師，整吓結他渡其餘生；可惜好景不常，又再捲入FBI、黑幫、軍閥及政府的角力鬥爭中，安東尼奧只好再次披上「結他」，大開殺界！
今集「結他」造型比前一集玩得更激，已經唔係結他藏槍咁簡單，最經典者，係開場一幕，邊彈結他邊跳住中美洲舞，而結他竟然是一支散彈槍，打到班酒吧地踎落花流水！另外玩結他遙控炸彈，亦比上一集的火箭炮嘅真實性高好多！
電影整體舖排尚算唔錯，而且故事亦同上一集有好多關聯，令人有好多回想！頭段同尾段打鬥最激烈，可惜中段文戲太多，而且多方勢力的鬥智鬥力，亦見少許亂，是一點敗筆！
區碼：3區
發行：年代影視
價錢：$145
