民主派議員之間係咪一定啱傾啲？咁又未必，好似噚日幾位政黨嘅正、副主席出席港台節目《政黨論壇》，席間每個人都要點一首歌，自由黨主席田北俊揀咗首《Standbyme》，前綫召集人劉慧卿就由頭撐田少到尾，反而頻頻找民主黨主席楊森嘅麻煩。
好似田少話有意玩直選，卿姐即刻話歡迎佢去自己嘅選區新界東，更保證唔會追殺田少。田少打蛇隨棍上，問卿姐支唔支持自己，可唔可以向選民話，唔投劉慧卿一票，就投田北俊一票？
卿姐聞言，唔鬧田少，反而鬧楊森，叫田少唔好學民主黨嘅「衰嘢」，因為民主黨上屆就係咁分咗劉慧卿唔少票，卿姐講到㷫，重話要同楊森算帳。
講講吓，卿姐又鬧楊森，成個民主黨咁大，竟然一個女性立法會議員都冇，係咪唔尊重女性。無端端俾卿姐鏟咗兩鑊，楊森點嘅歌又咁啱係《莫再悲》，係咪用嚟自我安慰？至於卿姐點嘅歌，原來係《BridgeOverTroubleWater》。
（圖）田少（右二）噚日上完電台節目跟住入馬場，賽後練馬師蔡約翰（左）同佢解釋隻馬跑第二只因排十四檔所累喎。
傳真︰2623-9278
電郵︰