吾爾開希來港，一啲資深記者同佢做訪問，跟埋去聽佢喺FCC演講。現時嘅前線記者，一九八九年民運之時，相信重係讀緊小學六年級或者四、五年級，八九年識得兼採訪過吾爾開希嘅記者，點都接近四十歲咯，記得當年肥佬黎管理佐丹奴，第一時間推出一系列「吾爾開希」、「你好，請你下來」嘅民運T恤，賣到斷市，令佐丹奴成為年青學生嘅熱愛牌子，肥佬的確善於利用時勢也。
事隔十五年，有啲人（包括記者）批評吾爾開希冇貢獻，出咗嚟好食好住，食到肥豬仔咁款。究其實吾爾開希係食類固醇治哮喘，因而發福，減唔到肥；其次，即使佢冇病，養到肥肥白白又如何？此乃佢個人自由，關我哋乜事？十五年前佢有份領導民運，此乃當年之事，不可與之後嘅生活混為一談。譬如好多人讀大學時，玩到癲晒，入社會做事就掛住養妻活兒，生活平淡；南韓學生在大學時唔上街擲石頭與警察對打，就係冇種，但畢業後加入三星、現代做行政人員，重有邊個會上街擲石。
我哋睇一件事，應該分開時間，一九八九年嘅吾爾開希、王丹、李祿、柴玲、沈彤，所作所為，啱唔啱？二○○四年嘅吾爾開希等人如果已經轉咗行，六四只係佢哋嘅回憶，點可以鬧佢哋冇貢獻。激情過後，每個人都有自由選擇佢自己要走嘅道路，要過嘅生活，值得別人尊重。