楊千嬅與陳冠希（Edison）在農曆新年都有工作在身，齊齊留港過節。被英皇解凍的Edison興奮表示下月可出碟；千嬅的新年願望則是下月初舉行的五場個唱可以成功，二人猴年伊始便率先發威，實屬好兆頭。
楊千嬅與Edison自從合作拍攝電影《玉女添丁》後，兩人十分投緣，感情好得如姊弟般。千嬅對Edison十分支持，每逢對方有新片首映，時間許可例必捧場；而她有新戲上映時，Edison亦會抽空前來打氣。
生肖屬猴的Edison性格洋化，對中國農曆新年習俗不太了解，但他從父親陳澤民口中，知道自己今年犯太歲，他日前說：「爹哋話會幫我去攝太歲，咁樣成年就會行好運，所以我都好放心。新嘅一年，我最開心係可以出廣東大碟，呢張碟十首歌都係我自己一手揀嘅，雖然我唔係成隻碟嘅監製，但參與程度相當高，隻碟九成係快歌，希望歌迷會鍾意。」
Edison今年亦有多部片約在手，他說：「𠵱家我已經有《新紮師兄》同《英雄無用》兩部戲要拍，到三月就正式同周杰倫一齊拍徐克部《頭文字Ｄ》，拍呢部戲最期待係可以同唱歌好叻嘅周杰倫合作，唔知佢拍戲有冇唱歌咁勁。接住我又會參演《千機變》續集，上半年因為有咁多戲要拍，所以農曆新年我唔打算出埠，會留喺香港陪爹哋過年。」
至於千嬅因為下月六日要開個唱，最近均忙於綵排，她說：「為咗開演唱會要留港過年，咁都幾好，因為我鍾意𢭃利是，雖然我未結婚，但係都會派開工利是畀啲同事，等大家開心吓。」
千嬅續說：「我已經搵咗Edison幫我做三場個唱嘉賓，另外兩場嘅嘉賓重頭痛緊，因為做個人演唱會壓力好大，搞到我完全感受唔到過年嘅輕鬆氣氛，滿腦子都喺度諗緊個演唱會要點搞。」
採訪：陳月媚 攝影：仇志德 協力：仇志中
猴子玩具提供：kit-cheKiss、Gifehouse
