噚日跑馬仔，除咗飛哥最威水拉頭馬，其實幾位自由黨現任、前任黨友都有馬出賽，田北俊最唔抵，愛駒跑梗頸二；至於前黨副主席、現任馬會主席夏佳理同退咗黨嘅財爺唐英年，佢哋嘅馬仔都唔多生性。
唐唐前日招呼記者參觀官邸時，講到第二日場馬，記者問貼士，佢都冇叫大家落注，睇嚟已經心中有數。唐唐重話：四隻腳嘅畜牲好易估，兩隻腳嗰啲先難估。
正如第三屆特首，正係由一班「兩隻腳」嘅候選人一齊跑，未到入直路，邊個敢落注？
講開唐唐，點都要提提佢官邸個可以放四百支紅酒嘅酒窖，牆身特厚，中間有隔熱層，可以慳番唔少冷氣，而且喺香港收藏紅酒，好處係唔怕空氣太乾，令瓶塞漏氣。
（圖）唐唐身後嘅酒窖可以放四百支紅酒，特厚牆身中間重有隔熱層，勁！
傳真︰2623-9278
電郵︰