財爺唐英年一生人都幾有「女人緣」，身邊除咗唐媽媽、老婆細唐太同三位千金外，至少重有一位女士經常圍住佢團團轉。呢位唐公子成日掛在口邊嘅女士，名叫「阿美」。
難得唐太聽到老公向記者大讚另一個女人，一啲都冇呷醋，原來阿美係六十幾歲嘅家廚，跟咗唐家三代人。舊年八月唐公子被傳接任財爺，記者於唐宅外守候，正係呢位阿美奉唐媽媽之命拎糖水、曲奇請記者食。
唐太噚日沉迷拍片，話自己最鍾意剪輯片段，重要加埋配樂。噚日佢除咗向客人派百元利是，完全唔得閒理一齊去參觀新居嘅四個細路，同由美國返港過年嘅叔仔唐聖年，只顧影低老公一舉一動，又捉住記者要每人影一段祝福佢老公嘅說話。
有行家乘機祝唐英年做第一屆嘅普選特首，搞到唐氏夫婦笑晒口但唔識點回應，唐太推話自己唔諗咁遠，唐英年則口窒窒話𠵱家已經係好大挑戰。
傳真︰2623-9278
電郵︰
