新車速報：<br>豐田EstimaXO-7裝備豪華坐得舒適

新車速報：
豐田EstimaXO-7裝備豪華坐得舒適

豐田Estima多用途MPV，一直不乏捧場客，皆因佢有無限改裝潛能，既可塑造成實用嘅載客用車，更可以加添豪華裝備，演化成一部媲美豪華轎車嘅高級座駕。正如呢部新版Estima咁，既有最新富Cyber嘅外形之餘，車廂三排座位重用上英式勞斯萊斯嘅真皮鑲嵌，唔單止坐得舒服重好講究㖭！

記者、攝影：陳偉林

在芸芸MPV車款中，向有「子彈頭」稱號嘅豐田Estima，一副時尚富活力嘅造型，可謂歷久不衰，加上原廠不斷替車款追加裝備，令呢部多用途MPV，長賣長有保持有高銷量呢！

前衞外形有號召力
而眼前呢部最新版嘅豐田EstimaXO-7型號，不單止有最新電鍍鬼面罩、一體化頭泵把連大型氣霸，還有高亮度Xenon頭燈、門邊電鏡連指揮燈外，重有Cyber尾燈編排同尾定翼，單係一副簡潔吸引嘅賣相，已教人留有深刻印象啦！

■全新高亮度Xenon頭燈配搭，有透徹嘅照射範圍。

■高置尾定翼連High-mount煞車燈，倍添動感。

■兩邊門鏡加有方向指揮燈，給人有易看嘅好處。



勞斯萊斯皮椅好出眾
講到車廂鋪排，三排七座位皆用上勞斯萊斯轎車用嘅英式真皮鑲嵌，不僅剪裁獨到吸引，而且置身其中重格外軟滑貼服，重有一份唔錯嘅承托感。其次，除三排各置有中央手枕外，中排之間重備有活動桌几，既方便擺放雜物外，車身左右雙電動趟門配搭，重方便到一眾乘客上落車㗎！再者，全車有高級桃木修飾之餘，四門電窗、門邊電鏡同雙天窗外，還有原廠恒溫冷氣同高級CD音響㗎！

■全新LED尾燈編排，既奪目又清晰。

■全新鬼面罩加上新穎大型氣霸組合，更添一份動感。

■除雙天窗配搭之餘，重有獨立送風口及照明。



跑車避震循迹性強
新車沿用一台3.0公升V6偈及4前速自動波組合，惟四輪改換上16吋合金胎軨外，懸掛組合重換上跑車化設計，既有提升行車嘅穩定性同支持力，而且重帶出呢部大型MPV車，可有出眾循迹演繹呢！再者，四輪碟煞加上ABS連EBD裝置，每有緊急煞車時，重予人有平穩制動反應㖭！

■車廂陳設講究出眾，高級真皮椅同桃木配襯，格外吸引有氣派。

■車身左右雙趟門設計，上落車廂倍感方便輕鬆。

■三排七座位以英式高級真皮鑲嵌，剪裁格外貼身舒適。



豐田EstimaXO-7規格
引擎：2994ccV6DOHC
馬力：220ps/5800rpm
扭力：31.0kgm/4400rpm
傳動：4前速自動波，前輪驅動
懸掛：（前）麥花臣支柱（後）扭力連桿
制動：（前）透氣碟（後）碟式（ABS）
輪胎：205/65R16BridgestoneB390
尺碼：4780×1790×1785mm
軸距：2900mm　車重：1760kg
平均耗油：9.4km/L
新車售價：$359,000
車輛提供：富利堡汽車（28776700）

■鑲有高級桃木嘅中控台，格外悅目兼且配備一應俱全。

■中排活動桌几連杯座，收摺後重帶出Walk-through嘅方便。

■尾排左右設有多個雜物匣同杯座，實用非常。



記者評語：造型獨特夠突出
新車套用上最新Cyber配件，令外形變得時款奪目之餘，車廂三排七座位，重用上英國勞斯萊斯轎車皮革鑲嵌，既講究又見乘坐愜意，對比起一般轎車，座艙嘅空間感重有過之而無不及呢！

■新車沿用一台3.0公升V6偈作骨幹，而四輪改用Sport避震，重有助行車平穩性。