農曆新年雖然係中國人嘅大節日，不過好多舖頭都會大休市，無處可去，放假呆喺屋企，除咗打機重有乜更佳娛樂？況且今日更係年初三「赤口」，不宜出門拜年。各位呢幾日相信都𢭃咗唔少利是，不如用嚟掃平Game返屋企慢慢玩，今日《蘋果》就搵嚟各類遊戲同配件，無論利是係咪大豐收都有好選擇。
記者：許福合
攝影：林柏鈞
ImageGirl：Fion
來來來！即刻拎晒啲利是出嚟睇睇今年收穫，如果你有一大班親友，利是大豐收，買Game嘅時候就幾豪都得喇，但如果你今年遇到利是荒，冇乜斬穫，揸住《蘋果》都有好多正嘢揀！
新推出嘅PS2遊戲一般都要三百幾一隻，對於利是戰績唔多好嘅機迷就要「貼錢」先夠買。其實有唔少正Game之前可能錯過咗冇機會玩，襯呢個時間掃番啲正Game，就係最佳時機。
《阿格斯戰士》為動作RPG，扮演戰士挑戰魔王；《HerdyGerdy》屬於動作冒險，人物角色具迪士尼風格。兩隻遊戲都有一定水準，每隻都只係$30就有得玩，放假消磨時間就最啱。
《MetalGearSolid2》推出之時勁Hit，成為唔少機迷日玩夜玩嘅遊戲，甚至因為缺貨被炒高價，不過現時就可以超低價$120入貨，好抵玩！
出咗冇幾耐嘅遊戲都有機會低價入貨，《天外魔境》同《盜墓者》就齊齊降價，前者大玩RPG，而後者就係出名冒險動作遊戲，玩法各有特色，但都只係平賣$190。
想出街都有機打就要靠GBA喇，呢隻GBA版《魂斗羅》係當年超任版本嘅強化版，又可以用對戰線連線玩雙打，價錢都唔貴，$100就有得玩，坐車拜年都唔使悶。
遇到有親戚嚟拜年，梗唔少得拎部遊戲機出嚟招呼大小朋友，咁就要預備定多幾個手掣，PS2嘅標準黑色手掣就賣$120，而GameCube就貴些少，要$150，幾封利是就夠找數。
老機迷都會認同任天堂紅白機絕對係經典主機之一，唔少名作都有喺紅白機推出過，若然你重留有遊戲盒帶，又想重溫呢啲經典遊戲，可以用$120買部兼容機玩玩，除咗支援紅白機遊戲，更內置咗7款原創遊戲㖭。
各位《真．三國無雙3》Fans見到呢支大旗一定兩眼放光，成個人咁高，放喺屋企一定威晒！
呢隻《惡魔城：無罪的嘆息》係惡魔城系列首次喺PS2上推出，所以一出已經特別受注目，如果你當時入唔切貨，都唔使失望，而家重有特別版可以揀，包裝更精美，重送埋海報，都只係賣$350。
任天堂遊戲一向極具特色，好似呢三款《牧場物語》、《MickeyMouseTrick&Chase》及《POKEMONChannel》，大人同小朋友都咁啱玩，新年招呼朋友一流。
XBOX玩家都有平Game執，大作之一嘅《真．三國無雙3》跌咗些少，賣$330，還未擁有嘅落伍機迷必定要買！另外還有《職業特攻隊》同《未來戰士3》，同樣賣緊$220，要掃貨係時候喇！
雖然冬天已經過咗大半，要買XBOX冬日套裝仍然有着數，附送《最後一戰》、全新《俄羅斯方塊》同《星際大戰：複製人全面進攻》3款遊戲，另外重送埋DVD電影播放組合，未有XBOX嘅機迷可以考慮！
身為機迷點可以無遊戲機喺身？家陣一部GBA都唔算貴，唔少人淨係利是錢都夠找數，呢款GBASP就有5種顏色可以揀，重送埋保護貼㖭！只要$800。想揀部特別啲，亦有款《聖劍傳說》特別版GBASP，連埋遊戲同機袋，開價$1,400。
任天堂神遊機攞正牌玩中文版任記N64遊戲，而且同手掣整合埋一齊，非常慳位，遊戲可存進記憶卡內，逐隻計錢，而且全部中文化，玩落又有另一番趣味。
■《聖劍傳說》特別版GBASP，售$1,400
呢部白色PS2深得機迷歡心，喺亞洲遊戲展2003大賣，若你對白色同樣情有獨鍾，只要利是收穫豐富，白色PS2必定成你網羅對象，跟機重有隻《GT4序章版》同GT手表，更加抵玩。
Nokia部N-Gage剛被評為最佳遊戲手機，用嚟打機確實又幾正，不過淨係靠利是買N-Gage似乎有啲難度，可能要「補貼」些少。機價賣$2,788，另外會送兩隻遊戲及$100現金券。
以上介紹嘅遊戲軟硬件，售價同贈品全部都係《蘋果日報》讀者尊享優惠，先到先得，售完即止。另外，重可以拎住《蘋果》到以下遊戲店，更可當作$10現金券，購買PS2、XBOX、GAMECUBE及GBA遊戲。
查詢電話：25753285
地址：灣仔東方188商場256號舖