喺美國影壇相當權威嘅美國電影學院，前日喺洛杉磯舉行第四屆頒獎禮，唔少影壇紅人包括妮歌潔曼（NicoleKidman）、查理絲泰朗（CharlizeTheron）同奇連伊士活（ClintEastwood）都有份出席，其中妮歌重好少有咁帶埋阿媽Janelle一齊現身㖭，唔知係咪因為最近妮歌啱啱同男友LennyKravitz分手，要搵阿媽傾訴吓呢？
美國電影學院頒獎禮嘅十大最佳電影之前已經公布咗結果，當中包括《魔戒三部曲：王者再臨》、《懸河殺機》同《TheHumanStain》等，所以奇連伊士活同妮歌都代表自己部戲領獎，但憑住《最後武士》入選嘅湯告魯斯（TomCruise）就唔見影，唔知係咪怕見前妻呢？講開靚佬湯同妮歌，彭妮露古絲（PenelopeCruz）最近就表示靚佬湯同妮歌離婚，絕對同佢冇關喎。
代表《Monster》領獎嘅查理絲喺近期嘅頒獎禮入面可謂盡領風騷，而各地嘅博彩公司都將佢列為金球獎頂頭大熱，睇怕呢個影后寶座都十拿九穩。
此外，前日頒獎禮上亦見到U2主音Bono同TheCorrs嘅Andrea現身，佢兩個為電影《InAmerica》合作嘅歌曲，早排入圍金球獎最佳原創電影歌曲獎，Bono日前接受訪問時話，今年會出席金球獎頒獎禮，但一定唔會好似上年攞獎嘅時候咁講粗口喎。
美聯社圖片
