今日正值赤口，亦即口角特別多之日，所以人人都暫停拜年活動改去拜車公，既可祈求來年轉運，又可避免與人有口舌之爭。據堪輿學家表示，赤口其實只屬傳說，年可以照拜，加上今日為壬寅日，屬大吉之日，百事大利，而南方會是全日最好的吉位，在南面活動可沾吉氣。大家今日可到港、九南區玩番日，以下提供一日行程，即管睇睇啱唔啱玩？
記者：黃婉冰 攝影：蔡鴻雯
模特兒：Carol、Tango、FiFi（RichStrategy）Natalie、Ricky
MakeUp：Meg
Hair：Rebecca（allfromDreamDestination）
鳴謝：麥玲玲師傅、侯天同師傅
香港南區
香港南區有淺水灣、深水灣、香港仔，要數多嘢玩、多嘢食，首選一定係赤柱。先去赤柱大街買特色精品，然後沿海旁漫步去赤柱廣場歎一頓海景午餐，行程咁豐富，重邊有時間同另一半嗌交，赤口都唔怕！
店舖老闆特別從各地搜羅了不同的地道精品，其中印尼及印度的手做精品最有賣點，全人手製，手工精細已值回票價！
店名：有意思禮品
電話：28657182
地址：赤柱廣場105號
鍾意戴番一兩條手鏈襯衫但又想款式夠獨特，最好方法就係DIY，舖頭有超過十款不同珠仔任你揀，逐粒計，任你自己配襯，揀完畀老闆幫你穿就搞掂，鍾意咩款自己話事。
店名：MingTak
電話：27713677
地址：赤柱大街40號B舖
行完腳仔軟可以去美利樓歎番餐，經過連日來又雞又角仔的轟炸，食番餐西班牙菜最啱，重有露天大海景畀你送飯，啱晒兩支公撐枱腳。
店名：ElCidCaramar
電話：28990858
地址：赤柱赤柱廣場美利樓1字樓102號舖
九龍南區
吉時求神 大吉大利
每年今日車公廟例必逼爆人，個個拖男帶女走去拜車公希望轉運，今年唔想再同人逼，可以改去紅磡觀音街的觀音廟。今日喜神、財神同時在南方，再夾啱吉時求神可增添吉氣，但記得出門時先向南行，然後再出發，而午、未（今日上午11時至下午1時、下午1時至3時）呢兩個時辰會係求神嘅最佳時候。
除特色意頭菜之外，商場更請來中式雜藝團、魔術師即席表演，一邊開餐一邊睇表演，節目啱晒一家大細。
店名：蔡瀾美食坊
電話：21287440
地址：紅磡黃埔花園新天地第八期
拜完神第二站就梗係醫肚喇！紅磡區出名多嘢食，唔愁無飯開，其中黃埔花園蔡瀾美食坊各食店為迎合新年，更推出多款不同的賀年菜式，梗有一款啱你胃口。
據說赤口的由來，是源自天上一隻叫赤狗的神犬，話說每逢初三，神犬會落凡間視察民情。但赤狗本身屬龍，火氣甚猛，只要有牠到過的地方，當地人都會變得脾氣極差，容易與人發生口角，所以人人都避免去拜年，同時叫這日做「赤狗日」，久而久之，不知不覺就被人叫成「赤口日」。
唔好以為留喺屋企就乜都唔使理，屋企有某啲方位要特別留意。堪輿學家麥玲玲教路：「有個位叫三碧位，係嗌交位，口舌多、是非多。而今年個三碧位喺東面，三碧位屬木，所以附近唔可以放有綠色物件，而木生火，可以改放一啲屬火嘅物品好似紅色玫瑰、紅色燈就可以。」
宜穿冷色減躁火
另一位堪輿學家侯天同師傅則表示，今日雖屬大吉之日，但肖猴、肖虎的人依然要特別注意，尤其是1956、1962年出生之人，今日心情會比較煩躁、情緒不穩，着冷色衫褲好似深藍色或黑色，都可以有助減低躁火。
肖兔同蛇的人，今日會有貴人星降臨，自己會變成貴人身份，會為身邊朋友帶來好運。有朋友肖兔或肖蛇，不妨埋佢身沾番啲好運！
適逢賽馬日，侯師傅特別為大家揀出2、7、12呢三個特別具旺氣的號碼。他表示只供參考，唔一定會贏，但玩吓亦無妨，小賭怡情，千祈咪瞓身！
