今日係甲申猴年嘅年初三，亞Mark謹代表我哋《車天車地》版仝人，恭祝全港車主路路亨通、出入平安。
農曆年前，豐田及萬事得代理，唔知係咪趕住送羊迎猴嘅關係，都不約而同咁有新車推出，難得踏入2004年初嘅香港車市有個好開始，兩家代理嘅新車款，都收到預計唔到咁多訂單㖭！當中，尤其係萬事得全新Mazda3車系，可能車款有全面革新關係，開售以來重接到近百部Order，而且四門同五門版嘅銷售數量重相若呢！
過往幾年因為經濟不景，唔少汽車代理商，只好薄利多銷將車價調低，雖然仍維持一定賣車量，惟實質利潤卻微乎其微，最終只會影響代理商嘅正常運作。但近期市況向好，亞Mark預期各大汽車代理商有新車面世的話，接單就「應接不暇」，賣車就「貨如輪轉」啦！恭喜！恭喜！