今日年初三，沙田車公廟一定被人龍包圍，近十萬人去參拜都似。左丁山最怕人逼人，梗係去沙田啦，不過入馬場啫，希望頭威頭勢，贏錢過年，有番個好意頭。
唔好以為馬圈中人迷信，其實新年拜神只係求心之所安，你話拜神會贏馬喎，個個練馬師都識做啦。實力練馬師簡炳墀就從來唔拜神，夥計去搞都會俾佢鬧，因為佢經常教訓手下：「有馬贏就日日都係過年，贏馬講實力，花時間去拜神，不如用番啲時間去操馬。」跟咗簡Sir好多年嘅葉楚航，可能得到簡Sir真傳，樣樣實事求是，亦唔會掛住拜神。你睇吓呢位新紮師兄今季已經贏馬二十幾場，成績叻過唔少老資格前輩，就知道努力、實力未必輸畀神力。
好多馬迷都鍾意買年初三意頭馬，今日最啱意頭嘅就係「恭喜讓賽」嘅「大四喜」，跑千四米，有權贏㗎！兩場重頭戲，猜中一隻位置馬就可以參加十萬黃金大抽獎。賀年盃就好易估，蔡神仙出三隻馬，「印度之星」、「大躍馬」、「色種好」三隻都夠晒惡，「印度之星」贏面甚高；百周年紀念銀瓶就麻煩啲，十四隻馬實力好平均，要我揀嘅話，夏佳理主席隻「駿河」、梁校長隻「豪奪」一時瑜亮，再加一隻「企業家」，希望中正。年初三入場，有「利是小馬」送，送完即止，又有「金至尊風車」畀大家轉運，莎莎化妝品、百老滙、金至尊有紀念品出售。朝早拜完年或者拜過車公，不妨入場！