積架S-Type新版更誘人

英國積架車廠響剛過去嘅北美國際車展（NorthAmericanInternationalAutoShow）上，展出咗Facelifted新版S-Type豪華轎車；新車機械配搭雖沒有多大變動，但略有改動嘅造型及車廂陳設，卻予人一新耳目之感；不如趁新車響今年四月正式推出前，一齊嚟先睹為快啦！

造型略有改動顯氣派
剛於早前北美國際車展亮相、並有望今年四月推出嘅Facelifted新版積架S-Type，造型看似與現有型號相近，但原來新車除車頭鬼面罩位置，比原有型號略有改動，以及改換新款合金胎軨外，頭冚部份更由原來以鋼製，改為以鋁合金鑄造，此舉除可令頭冚重量較前來得較輕之餘，更可從中改善前後車重分布㖭！

■座艙鋪排氣派十足，顯現出英式豪華轎車風範。

■新車備有多個引擎配搭選擇，以切合不同需要。

空間寬敞設備齊全
至於車廂方面，新版S-Type嘅空間仍見寬敞闊落，匹配前後兩排承托力甚豐嘅座椅設計，乘坐來得妥貼舒適；不過，廠方為迎合唔同用家嘅口味，故特別為選擇新車嘅用家，提供更多車廂色調及桃木用料選擇。設備方面，除電窗、電鏡外，一體化嘅中控台上，更備有全新編排嘅高級音響及冷氣，用落方便又容易，當然唔少得重有多個安全氣袋組合，以確保乘客安全㗎！

■全新表板鋪排簡潔易讀外，半皮半桃木軚盤上更備有各項設備嘅遙控鍵。

多個引擎配搭任你揀
與舊有型號相似，屬Facelifted新版嘅S-Type，備有多個引擎型號供用家選擇；當中，包括入門版嘅2.5公升V6（201匹）、備受用家追捧嘅3.0公升V6（240匹）、4.2公升V8（300匹），同埋頂級跑版S-TypeR所採用嘅4.2公升V8Supercharged引擎（400匹），絕對能迎合唔同用家嘅需要。
其次，新車底盤穩紮可靠之餘，一套CATS（ComputerActiveTechnologySuspension）懸掛系統，響多套電子系統如TractionControl及DynamicStabilityControl等輔助下，更能顯現出不俗嘅路面循迹性呢！

■中控台設備齊全易用，頂級S-TypeR嘅波棍的更有R字樣，以資識別。