每逢到新春佳節呢啲銷售旺季，Game界一定有唔少着數畀機迷，而香港兩大主機陣營PS2同XBOX，均有賀歲優惠推出，等大家𢭃埋啲利是買機兼買Game，齊齊度過豐收嘅猴年。
記者：徐影龍
雖然呢個農曆年冇咩重頭勁作推出，不過SCEH都冇偷懶，搞咗好多HitGame嘅中文版嚟香港，等大家打起機上嚟都「同聲同氣」，一班人玩更係氣氛爆棚！最新嘅中文化Game包括《TimeCrisis3》（火線危機），同世嘉近期勁Hit嘅《女忍者》，可能你會覺得呢兩隻Game都以射擊、動作為主，中文化冇乜吸引喎。其實日本人做Game好認真，人物設定及世界觀做得好仔細，不但中文化介面易於上手，而且一啲過場劇情都睇得明，玩得零舍投入。不過最吸引要算大年初一推出嘅《死魂曲～SIREN》中文版，屬SCEI一鳴驚人嘅恐怖大作，好多機迷忍住唔買日版，都係為咗等隻中文版推出咋。
SCEH重搞咗個儲分換禮品優惠，除上述三款中文化遊戲，連同之前推出嘅《GT4：Prologue》、《櫻大戰：熾熱血潮》、《亞克傳承：精靈之黃昏》等三款中文Game，均附送1Point貼紙，儲夠唔同數量嘅Point就可換唔同嘅禮品，詳情可到PS2官方網頁查詢。
儲分換禮品名單：
1Point：銀製記憶卡盒
2Point：2004精美掛曆
3Point：打機保暖毯
4Point：原宿簡約風褸
PS2官方網址：
至於香港XBOX亦唔執輸，效法日本好興嘅福袋概念，搞咗個《XBOX賀歲福袋》畀機迷。呢個福袋賣$388，入面包含一個XBOX特別版手掣（灰?藍?綠）、一隻「集激」Game、一隻XBOX2004大作預覽DVD，另外重有一張「XBOX即擦即獎刮刮卡」，分分鐘畀你贏份新春大禮品都未定。全部物品都有個搶眼大紅靚袋裝住，夠晒好意頭。不過根據日本福袋規矩，理論上係冇得揀入面嘅Game嘅，想攞心水正Game就要睇你手氣喇。
XBOX官方網址：
