何志平求唔求籤早前成為全城熱話，民主黨嘅馬丁李柱銘噚日去酒樓同街坊拜年又傾埋一份。身為天主教徒嘅馬丁雖然對求籤一竅不通，不過就覺得啲求神問卜嘅嘢好有趣。
原來身為大狀嘅馬丁有啲客好「迷信」，馬丁話，試過有個客俾廉署通緝走嚟搵佢，馬丁梗係即刻叫對方自首，重約埋一齊去，點知馬丁因為大塞車而遲到，個客竟然好心急咁自己入咗警署，原來只係因為怕錯過吉時，最後唔知係咁靈定係咁蹺，個客真係大步檻過。
另外一次，有個客揸唔定主意請邊個大狀，於是攞咗三位大狀嘅名去黃大仙求籤，得出結果係：「第一個唔識、第二個唔掂、第三個就喺談笑間幫到你」。點知第二日，「唔掂」嗰位大狀真係俾人告，個客即刻搵「第三位」大狀（即係馬丁）幫手。馬丁喺庭上遇着「釘官」，心知不妙，點知個官聽陳詞時竟然好好笑容，後來重放咗佢個客，令馬丁嘖嘖稱奇。
重有個客因為危險藥物被拉，但就好淡定，原來又係求咗支籤，話佢實冇事，馬丁唔信，點知開庭嗰陣主控竟然主動提出畀佢保釋，原因係控方認錯人，個客最後重平安無事㖭！八方相信馬丁咁講唔係導人迷信，只係有時啲嘢又真係好神奇嘅！
（圖〉馬丁噚日去酒樓同街坊拜年，好受歡迎，重有人要求合照㖭。
傳真︰2623-9278
電郵︰