新一年開始，當然最好送舊迎新，為自己定下來年大計。踏入猴年，唔少日韓青春偶像，對新一年定下好多願望，好似佐藤江梨子發憤要做才女、成宮寬貴同BoA都好希望事業可以有更好嘅發展。
同唔少由水着出身嘅日本女星一樣，佐藤江梨子好想喺自己走紅之後，證明畀人睇自己並唔係胸大冇腦，銳意表現自己嘅才華。佐藤寫新年願望時，寫住「女KUDOKAN」，意思原來係要做女版嘅日本才子宮藤官九郎，想學人做埋導演同寫劇本。
妖男成宮寬貴唔止着衫好有自己嘅特色同個性，佢個人原來都好有文學修養，好似佢寫猴年願望嗰陣，佢就畫咗把紙扇同寫咗句日文，當中「末廣」兩個字唔係要反轉廣末涼子，而係扇子嘅意思，喺日文中重可以解作「逐漸展開」，佢希望今年可以大展鴻圖。
經常日韓兩邊走嘅BoA，近年真係好勤力工作，佢話自己重keep住搵黑人老師教跳舞，不過，佢認為自己唔會滿足去年嘅成績，會更加努力喺自己嘅歌唱事業中有更多突破，所以佢畫咗啲音符又寫上個Wide字，最搞笑係佢畫個電視機上有自己個大名，幾乎掙爆個電視㖭。
二人少女組合Juemilan成員鈴木惠美，論知名度同受歡迎程度唔高，不過佢勝在夠博，影賀年相嗰陣，唔止着套色彩鮮豔奪目嘅和服去到寺廟取景，重好認真咁搵隻真馬騮擒喺膊頭合照。如果佢繼續肯博，可望年內有得發圍。鈴木話：「見到monkey令我想今年過得好funky！」