過去一年，朱茵的工作排得密密麻麻，不過到了農曆新年，她有三日假期，但她不會與男友黃貫中出外度歲，而會熱熱鬧鬧與家人品嘗賀年美食和攻打四方城，希望發新年財。
朱茵早前抽空到花墟買年花，她表示在眾多年花中，比較喜歡水仙，她說：「我好鍾意水仙花嘅香味，放一盆喺屋企已經好香，不過我就唔識點樣整水仙頭，所以一直都係由屋企人負責。」
朱茵透露已經數年沒有與家人一起度歲，難得她年初一至三都放假，所以她回家跟家人歡度，順道在四方城上一決高下，她興奮地說：「我平時都唔會打麻雀，惟獨喺新年就會同屋企人打，到時會有好多親戚上我屋企拜年，可以𢭃利是之餘，又可以發吓新年財，我最希望今年可以食到一鋪十三么啦。」朱茵表示男友黃貫中亦會到她家拜年。
問朱茵收利是時會否被親友催婚，她說：「親戚追問就好正常，不過我唔會理，一於𢭃咗封利是先，而且我重好enjoy收利是嗰種感覺。」
此外，朱茵表示在眾多新年美食中最喜歡吃髮菜蠔豉冬菇及年糕，她說：「我由細到大都好鍾意食髮菜同冬菇，而且廣東式嘅年糕都係我心頭好之一，不過我淨係識得食唔識得整，但係我都會盡量忍口，好怕食得多會增磅呀。」
問朱茵有何新年願望，她說：「最重要都係身體健康，如果唔係有工作都做唔到，有錢都賺唔到。」
採訪：李珮洳 攝影：仇志德
場地提供：山城花藝
