八方今年收到唔少猴年賀卡，其中一張（圖）係由新嘅英國駐港總領事柏聖文（StephenBradley）送嘅，原來呢位中國及香港通已經不知不覺嚟咗香港履新，而且入鄉隨俗，同港人一齊慶賀新禧。
柏聖文由北京調嚟香港，接替何進爵士，真係嚟得合時，皆因佢老友煲呔曾最近專責睇政制改革，而柏聖文剛好係八八年港英同北京就政制發展大爭拗之時，出任港府副政治顧問，直至九三年先離開港英政府，所以當年中英爭拗嘅內容，《基本法》嘅起草過程，都瞭如指掌。
當然今時唔同往日，當年教曾蔭權打煲呔嘅柏聖文都會睇定啲先。其實7.1五十萬港人上街之後，以美國為首嘅西方民主國家都密切關注呢塊特區土地上嘅一舉一動。今次護法來港，除咗特區政府之外，英美法加日嘅領事館都大為緊張去收料，外國勢力不嬲都喺香港有天線，中方官員使乜咁大驚小怪。
傳真︰2623-9278
電郵︰