賀歲盃花絮

區旗花面至受歡迎
為增加氣氛，主辦單位噚日特別幫入場球迷免費畫大花面，最受歡迎當然係香港區旗，其次就係瑞典同挪威，洪都拉斯國旗就冇乜人想畫。全場最出位，要數一對將全塊面畫晒瑞典國旗嘅孖仔，不過最後都唔能夠幫到球隊贏波，可惜！

卡祖「詐死」噓聲四起
洪都拉斯贏波功臣卡祖除咗入波叻，原來做戲都有一手。好似噚日對港聯，當洪都拉斯領先一球後，呢位入球功臣竟然兩次無緣無故扮傷「詐死」；等球證畀軍醫入場時，佢就立即跳起身，重鬼咁生猛繼續踢波，難怪被香港球迷噓聲四起。

天冷啤酒女郎「失蹤」
以往賀歲波唔少得啤酒女郎現場向球迷兜售啤酒，不過，噚日天寒地凍，大球場當然見唔到豔女郎攞住一桶桶啤酒嘅情況。但好奇怪，新聞中心入面，賽會免費提供畀傳媒嘅飲品，獨孤一味得啤酒，唔通想我哋寫「醉稿」?

球迷用吹氣棒棒洩憤
噚日賽會送畀球迷嘅巨型海報同吹氣棒棒，原先以為球迷會收藏留念，點知港聯輸波後，吹氣棒棒最先遭殃，全部被球迷整爆；至於巨型海報就變成紙飛機，完場後飛晒落球場。最辛苦當然係一班清潔工作人員，無端端多咁多嘢做，賽會呢次好心做壞事咯。