利物浦前晚臨尾香，被狼隊迫和一比一；但係冇法啦，幫狼隊入波嘅堅尼米拿係強隊剋星，算利記唔好彩囉。
堅尼米拿幾日前就幫狼隊爆大冷贏曼聯一比○，之前亦試過喺歐洲國家盃外圍賽幫蘇格蘭摸和德國一比一。對利物浦嘅入球係佢近三場第四球，狼隊啲球迷肯定錫晒佢；不過我求大俠更欣賞狼隊老鬼恩斯同艾雲；話晒佢兩個年近四十，但就可以喺五日內踢兩場硬仗（對曼聯同利物浦），一句講晒：勁呀！
超聯成立以嚟，喺聖誕節包尾嘅球隊一定降班，但我求大俠就認為狼隊可打破宿命。事關冇乜鬥心嘅李斯特城同為錢煩惱嘅列斯幾乎降硬，只要狼隊班波繼續踢出拼勁，隨時鍊贏樸茨茅夫、布力般或曼城而繼續留喺超聯。
難取代李奧地位
唔知係咪成日有傷關係，曼聯後衞布朗畀我求大俠嘅印象係身重、轉身慢、同門將時有誤會、間唔中擺烏龍；紅魔爆大冷輸畀狼隊，就係佢轉身轉到跣低咗所致……但佢就好受領隊費格遜欣賞，聽聞一張成千萬鎊嘅五年約等佢簽㖭。大膽啲講，佢應該代替唔到停賽嘅李奧嘞。
為杜格利殊爭光
前利物浦名宿杜格利殊個大仔保羅，曾經喺「父蔭」之下效力過紐卡素及些路迪等大球會，可惜愈踢愈沉，最後要淪落到喺愛爾蘭至有班落。可能真係猴年好運，保羅最近獲意甲摩德納招攬，同佢簽三個月短期合約；相信翻身及為父爭光都係呢鋪嘞，希望佢好好把握機會啦！
增半場休息時間
德國聯賽會日前去信國際足協，希望延長半場休息時間，由十五增至二十分鐘，賽日可以賣多啲啤酒同香腸，令每間德甲球會每年賺多三十萬歐元（約二百九十五萬港紙）。站喺球迷角度，買嘢食買嘢飲都係其次，重要係有多啲時間去廁所。你知啦，排得隊嚟十五分鐘邊夠呀！
分化紐約球迷
新澤西網隊噚日同紐約一名地產富商域拿達成收購協議，以三億美金出售球會。域拿一早話明會將網隊由新澤西搬到紐約嘅布魯克林區，如果順利嘅話，紐約遲啲好可能同洛杉磯一樣，同市有兩支打吡冤家。到時紐約嘅球迷就要決定到底捧老字號紐約人，抑或東岸兩屆盟主網隊喇！