恭喜恭喜，恭喜各位讀者一片順景，樣樣心想事成，做生意嘅賺多啲，讀書嘅成績驕人，打工嘅升職加薪，人人都四季平安、身心健康、生活愉快。
今日大年初一，初出門梗係要揀吉時。適逢吉時係寅時酉時（下午三至七點，可能晏得滯，退而思其次，早啲出門拜年，寅卯辰巳時（早上三點至十一點）均合，睇你可以早到幾多點至起床啦。通勝話丑時歲破、午時日破、未時月破，最好不用。今日喜神西北、貴神東北、財神正東，正西正南勿向。
呢啲事，信者可遵照，不信者百無禁忌。前輩遜翁從來不信，D姐見到佢曾經講解犯太歲，佢話：「心領心領，唔使同我講，唔知好過知。」遜翁生活優遊，體魂強健，上市公司主席Y已經退休，事務交由佢位公子基金V打理，基金V鍾意基金投資多過睇住建造實務，請咗神童K做CEO。主席Y以前公開亮相之時，一睇就知道年紀有番咁上下，已年過七十。但原來遜翁與主席Y係同學，而遜翁外貌似係比主席Y年輕十年。
遜翁唔信，有好多朋友就寧可信其有，凡係屬虎猴蛇豬嘅都訂造太歲牌，掛在身上或放在口袋，求其心安而已。左丁山喺羊年犯太歲，掛太歲牌掛足一年，托賴各位鴻福，叫做樣樣OK，真係多謝D姐關照也。