女子組合Cookies前日推出新碟，四餅女Stephy、Theresa、Kary及Miki當日特往旺角逛花墟及年宵市場，並購下寓意大紅大紫的「一串紅」、「一串紫」以及銀柳，希望新碟能夠賣個滿堂紅。
雖然旺角花墟人頭湧湧，不過四餅女卻逛得甚為開心，大家還手挽手行路以防走散，當她們步行至賣桔的攤檔時，一見巨型大桔，即忍不住嘩聲四起，手舞足蹈一番！
Cookies出新碟遇正勁敵Twins又出賀年歌，但Cookies在碟內卻未有灌錄應節歌曲，在牌面上似較為蝕底，她們聞言即說：「咁唔同嘅，我哋冇賀年歌先夠特別，同埋我哋張碟係以運動做主題，夠晒活力，有夏天feel，喺咁凍嘅天氣之下，令大家有啲熱辣辣嘅感覺呀嘛。」
此外，Cookies昨日到商台接受訪問，當她們看到全盒上的食品時，即急不及待吃零食。問Cookies過年時會否買桃花，祈求來年有桃花運，四位成員連聲叫「不好」，Miki說：「怕有桃花劫咋！Kary個朋友唔知係咪行年宵時兜錯方向，所以舊年感情生活都好差。」
採訪：朱倬誼 攝影：林德雄