電台節目主持麥潤壽前日終於搵番失蹤咗兩日，患上老人癡呆症嘅媽媽，一家人開開心心團年過節囉！麥潤壽噚日帶埋媽媽去港台接受車淑梅訪問，公開多謝嗰位仗義的士司機盧澤生，重即時送咗個星形水晶擺設畀佢，盛讚佢係「愛心之星」。而七十五歲嘅麥媽媽對於佢嗰兩日嘅事，全無頭緒，佢好無助咁話：「我都唔記得自己去咗邊，咪周圍行囉。」愈講愈傷心，重眼紅紅㖭，場內個個都為之動容。
麥潤壽話媽媽除咗有老人癡呆症外，腦部重生咗個瘤。佢一臉憂心話：「半年唔見三、四次，但今次唔見咗兩日，我都擔心到喊，因為天氣太凍，發現佢時身上只得二十幾蚊，都唔知有冇食過嘢。」問佢點解唔請個看護睇住？麥潤壽無奈咁話：「媽咪自尊心好強，唔鍾意人照顧。我三歲死老竇，幾姊弟都係媽咪養大，佢好堅強同執着，冇辦法。」不過，麥潤壽話為安全計，都會考慮請個工人陪住老人家。
做咗人阿媽嘅陳芷菁，噚日接受商台查小欣電話訪問，佢話：「個女都成兩個幾月大，搵人幫佢改咗個名叫張珈瑋，人哋話呢個名會令人硬正啲。我𠵱家重畀佢睇卡通片《天線得得B》，佢睇完成日都冇喊好乖。下星期我就會開工，而且都回復番生之前嘅磅數。」
無綫行政主席邵逸夫（六叔）喺無綫嘅最新一期《信訊》同員工發表新年賀詞，六叔讚去年無綫劇集《戇夫成龍》、《洗寃錄II》同《萬千星輝賀台慶》分別有三十五點以上收視，而直播西班牙勁旅皇家馬德里喺香港踢嗰場賽事，收視更高達五十一點，創下九一年嚟最高紀錄，希望員工繼續努力不懈發揮所長喎。
肥媽瑪利亞噚日出現喺赤鱲角機場，佢準備去美國拉斯維加斯登台，肥媽話：「新年去做騷，我重帶埋十六個月大嘅孫女一齊去，咁樣高興啲。」肥媽做咗纖體公司嘅代言人，佢自己呢排瘦咗好多，肥媽話：「呢個月我瘦咗二十四磅，好有成績。」咦！咁睇嚟好快大家就會睇到肥媽嘅三點式相啦！
陳曉東早前去韓國領取「亞洲文化交流貢獻獎」，一班韓國歌迷每日都到東東住嘅酒店等佢，幾名歌迷重帶埋一啲韓國傳統過年食品畀東東品嘗。東東重食得津津有味，但啲歌迷就嫌唔夠好，不過東東就話：「韓國人好注重禮節，不過我同佢哋講，啲食物係我嚟韓國後食過最好食嘅嘢，佢哋就開心番啲。」
牽涉入廉署「舞影行動」嘅無綫監製陳家倫，日前已經向無綫遞信辭職，做到三月尾就正式離開，前晚無綫製作部總監汪岐、已經歸隊嘅助理總監何麗全以及無綫一班監製，同陳家倫食飯餞行，順道成班同事食團年飯。馮仁昭知道陳家倫同無綫班同事感情一向唔錯，今次陳家倫離職，佢班同事都好唔捨得！
陳慧琳（Kelly）新正頭就同讀者拜年，舊年年中佢大感冒影響工作，猴年希望人人身體健康。Kelly同馮仁昭話每年都好想去維園行吓花巿，買啲古靈精怪得意嘢，不過入行以嚟都未去過，今年都唔例外，梗係啦，Kelly行花巿，重唔狂俾人圍住睇，相信都幾難迫番出嚟囉。
