今日頭場先上演瑞典對挪威嘅北歐打吡，雖然兩隊唔少球星冇隨隊，不過，鄰國對碰點都矚目，所以挪威嘅電視台會直播呢場波番去，等佢哋啲球迷可以睇吓球隊打成點。
「神奇教練」米路重臨香港，除咗帶隊踢賀歲波外，噚日重應傑志足球隊嘅邀請，向傑志職球員講咗個講座，而米路同傑志教練兼球員鄭兆聰關係向來良好，家陣聰仔開始教波梗要出手相助啦！
近幾屆賀歲波，無論戲碼點樣，初一點都會有超過兩萬球迷入場，而過去幾日預售反應只屬一般，不過，噚日天氣轉晴加埋年三十，唔少市民開始放假，幾個預售站都多咗球迷買飛，而噚日埋單計數，兩日賽事夾埋賣咗超過一萬二千張，當中初一就佔咗六千二百張；至於初四決賽日收唔收得，就要睇港聯贏唔贏到洪都拉斯入決賽嘞！
今年賀歲波將一如以往，賽前有醒獅隊舞獅助興，今年當然唔會例外，賽會暫定兩點四開始舞獅，另外，賽會亦安排咗專人免費幫球迷國旗噴面助興。順帶一提，賽會響每場波都會抽一位幸運兒，送佢一張今夏歐洲國家盃決賽周嘅波飛，球迷睇波之餘，重可以碰吓運氣。