今日猴年初一，八方祝全港市民身壯力健、有工開、有飯食，同埋立法會民主大會師。
民政事務局局長何志平，舊年去車公廟求咗支下籤，結果靈過鬼。八方有一個老友，係回流嘅加拿大公民，舊年一見到何志平求咗支咁嘅籤，信到十足，即時舉家再搬返加拿大。後來，香港沙士、禽流感，年尾重嚟多隻白無常蕭蔚雲，張開個血盆大口，咆哮訓斥，一見發財，可見肥何求得嘅呢支車公籤，幾咁有力，八方呢位加國老友，自幸走得快，去到嗰邊，隔岸觀火，心情大靚，重搞到個老婆大埋肚，第三個即將臨盆㖭。
喺溫哥華住到咁上下，對得啲海鷗海豹多，口淡淡，梗係又想回流返轉頭。八方呢位老友，想肥何年初二再去搵車公諮詢吓，好等自己決定今年返唔返。點知肥何今年偷懶，取消訪問車公廟，頓時冇咗神明指點，香港今年，如果有乜冬瓜豆腐，咁咪令人無法未雨綢繆？
因此，肥何今年年初二唔肯去車公廟，不但令八方喺加拿大嘅老友媽媽聲，搞到佢抉擇無從，肥何一年𢭃四百幾萬，人工嘅唯一價值，就喺年初二去車公廟嘅呢一鋪。你睇肥何求籤幾靈，今年若然再整多支下下籤，就即是話瘟疫重臨，由梁振英上台呀咁，啲人都叫做識得走避吓。唔去求籤，即係失職，肥何算唔算自私咗少少呢？
講到自私，阿董又出現嘞，發表所謂賀詞，話經濟出現V形反彈，得大陸CEPA所助，香港已經搵到新方向。
V形反彈？乜嘢反彈？無非係股市炒到新高，樓市見少少回升，同埋大陸自由行，人頭湧湧，飲食零售，生意叫做好番啲。
其實喺九七之前，香港不嬲更加旺，到咗廢董上台，一招八萬五，全部打沉。打沉晒之後，阿董同成班親中土共佬砌詞狡辯，就話以前嘅繁榮，係畸形嘅泡沫，好唔合理，重係由英國佬故意留低嘅泡沫炸彈，𠵱家應該謀求轉型，重新洗牌。言下之意，阿董搞到百業蕭條，全港重要多謝佢㖭。
言猶在耳，請問呢一輪嘅所謂復甦，同泡沫有乜分別？又係股票、零售、飲食，邊一樣唔係九七之前見過晒嘅虛火？但廢董𠵱家又唔同嗰副面口，大讚係「V形反彈」，話咁就係「新方向」，咁佢當初「吩咐」梁錦松全力推動嘅經濟轉型、高科技生產基地、中藥基地，大話連篇，今日又去晒邊。
冇錯，失業率係下降咗，但呢啲唔係好似白頭蕭口邊嘅白泡沫，又係乜？
新的一年，阿董嘅常識，依然毫無進境。今日年初一，八方再恭祝市民順境，並呼籲阿董嘅頭馬鄔維庸同譚惠珠新年流流，唔好講嘢露面，免至俾港人見到，從此成年行衰運！
傳真︰2623-9278
電郵︰