唔講唔知，原來馬會嘅投注站已經踏入第三十個年頭，今年重破天荒喺大年初一、年初二開門㖭，加埋年初三慣例賽馬，三日新春假期投注站都照常營業。
馬會搞足智彩至今，攻勢浪接浪，第一擊「主客和」、第二浪嘅「讓球主客和」同過關、第三波「六寶半全場」彩池。我求大俠覺得雖然風高浪急，但波友大致受落；而第二期「六寶」頭獎若一注獨得有逾一千萬元派彩，相信係繼「六合彩」後另一「巨獻」，難怪今次新正頭，投注站職員與波友、馬迷齊度歲，實行服務為先，抵讚！
國足教練阿里漢決定畀喺海南島集訓嘅球員返屋企度新歲；球員就爭住買海南特產水果同海鮮過年，好似肇俊哲就買成籮椰子返屋企；阿里漢自己決定留喺三亞市小休。國足今年咁多比賽，阿里漢都識得入鄉隨俗，畀班球員放假，都算唔話得，勉強留班球員盞冇心機練！
前晚帕爾馬響意大利盃對拉素唔能夠平反敗局，賽後教練柏蘭迪利承認，阿祖安奴應該冇機會再替帕爾馬出賽，因為佢日內會投效國米。「阿祖」明知就走都冇欺場，踢足全場兼唔錫身確抵讚。不過柏蘭迪利就唔識做，應該完場前換走「阿祖」，等佢可以接受球迷歡送嘛。
曼聯𠵱家喺杜拜話就話集訓，其實就係度假，班球員亦好放縱，除咗落吧媾空姐外，重猛咁劈酒；其中飲到醉醺醺嘅布朗，更差啲俾個保安踢出門口。曼聯返嚟之後會喺禮拜日場足總盃對丙組仔諾咸頓，對手實力雖則有限，但如果佢哋重唔收拾心情，隨時俾人「大大鑊爆一鑊」。
芝加哥公牛嘅吉祥物DaBull原來係一隻大「毒牛」！扮演DaBull嗰位仁兄最近俾差佬捉到喺自己架貨車度賣大麻，當場人贓並獲斷到正，今次真喺唔慌唔吉祥囉！其實NBA已不時傳有球員食大麻，今次連扮DaBull嘅人，都暗地裏做埋啲咁嘅勾當，乜形象都冇啦！