群星祝願猴年更好

今日大年初一，體育組先向各位讀者講聲猴年愉快、身體健康；等了十一年，猴子終於成為新一年主角，不如聽下幾位本地運動員對猴子的感覺。

黃金寶：心想事成
一如以往，訓練大過天的「阿寶」今年正值要備戰奧運會，所以早在農曆年前已隨隊到了大陸集訓。對於節日沒太大觀念的「阿寶」來說，訓練真的比過新年來得重要。
對猴子感覺：覺得猴子活潑、好動，像永遠停不了似的。
猴年願望：人人身體健康，心想事成。

羅振邦：活力常在
效力晨曦的左中場羅振邦是參加嘉士伯盃賀歲波的港聯陣中唯一「猴子」，而這名新晉港腳自言，由細到大已經好似馬騮仔咁好動，細個踢波踢到夜晚十點才返屋企。
對猴子感覺：充滿活力，冇時停。
猴年願望：希望香港同本地球市都好似馬騮仔一樣咁有活力，另外自己則希望喺球隊有更多上陣機會。

石少基：盡擸冠軍
效力南華的香港籃球隊代表石少基也是猴年（80年8月9日）出生，他覺得自己的性格同猴子十分相似。
對猴子感覺：猴子給人感覺精神奕奕，活力充沛，又合群性強，自己亦有這些優點，同隊友相處愉快。
猴年願望：首先希望香港再唔會有「沙士」，打波方面，希望南華可以攞晒銀牌同聯賽冠軍。

李麗珊：開開心心　黃德森：身體健康
碰巧在年初一滿三十八歲生日的黃德森，生日節目就是和太太李麗珊到雙方家長拜年度過。
對猴子感覺：
黃德森：我自己的性格比較慢條斯理，而猴子給人靈活的感覺，同我有點不太相像。
李麗珊：我覺得猴子既活潑、又叻，自己最似猴子的地方是腦筋轉得快。
猴年願望：
黃德森：我的新年願望是「沙士」不再來，人人身體健康，在奧運後有新的目標，就是希望滑浪風帆更加蓬勃。
李麗珊：最緊要保持身體健康，活得開開心心。雖然參加奧運，不過會如常努力練習及備戰，不會給自己壓力。

吳嘉韻：世界和平
香港女子壁球排名第三的吳嘉韻，原來在猴年年三十晚（81年2月5日）出生，她笑言每逢過年，長輩都會給自己兩封利是，一封是過年利是，一封是生日利是。
對猴子感覺：猴子機靈又敏捷，成日坐唔定，同自己的性格十分似，自己自細也是「百厭星」。
猴年願望：希望今年的亞洲壁球隊際賽，香港隊可以取得頭兩名，另外希望世界和平，唔好再有戰爭。