今日大年初一，我大口羅拉恭祝各位《蘋果》讀者猴年行好運，而上戶彩同深田恭子等一班日本藝人，亦齊齊裝扮得靚靚，揸住今年嘅太歲爺馬騮公仔同大家拜年，有啲重自己扮埋馬騮搞搞氣氛㖭！講到新年願望就各自各精采，有啲想抽時間去旅行充電，有啲就考車牌證明自己大個女喇！
近排趕拍新劇《網球女將》嘅上戶彩，因為密密苦練打網球，所以佢話今次着和服伸直條腰拍賀年相嗰陣，其實係周身骨痛。不過上戶彩話能夠飾演呢個經典卡通人物角色，幾辛苦都值得。講到猴年大計，上戶彩話：「我已經夠十八歲，所以新一年最希望可以考到車牌。」
尊尼少男組合KAT-TUN，認真識得逗人開心，成員中丸雄一帶頭整咗張賀年卡送畀fans，佢重拉埋成班兄弟扮馬騮影相，而中丸自己就化身小馬騮喺班大馬騮頭上四圍走，重寫埋大字請大家今年多多關照，夠應節之餘，真係夠晒得意同熱鬧。
上年好努力工作嘅深田恭子，話自己細個時好渴望二十歲結婚，𠵱家佢已經二十一歲，但已經冇咁嘅結婚衝動，重認為𠵱家最緊要係生活得充實。不過，恭子仍然好想今年唞唞出外旅遊，佢話：「上年我太勤力，完全冇時間去外地玩，今年一定要補番數。」
同濱崎步如膠似漆嘅長瀨智也，一向唔敢得罪事務所，所以佢甚少公開談論自己嘅戀情。雖然好多人好期望長瀨快啲喺猴年同步姐拉埋天窗，生番個馬騮仔，但長瀨講到自己嘅新年願望時顯然有啲行貨，佢話：「新一年最想認識一吓唔同嘅人！」
去年成員私生活各自各精采嘅嵐，走埋一齊影賀年相，點都要扮番乖乖仔送上最甜嘅笑容冧fans嘅！佢哋講新年願望，都係不離工作同想去BBQ、滑水呢啲好健康嘅活動，但我羅拉就希望二宮和也今年生性，唔好再俾人發現搵網友洩慾，令fans傷心。