民政事務局局長何志平舊年去到車公廟，用隻肥手一抽，求咗支下籤，香港跟住就經歷咗最艱苦嘅二○○三年。𠵱家又近年尾，記者一直追問何局長重去唔去求籤，佢今次終於都要借個女嚟過橋，話今年要陪妻女，唔得閒求籤嘞。
繼日前出巡，何局長噚日去到旺角花墟，又買年花又玩親民，見到有個細路坐喺路邊花槽，又行埋去拍晒膊頭合照。不過，記者始終唔放過機會追問，佢唔去求籤，係咪怕黑仔，再求到支下籤呀？
何志平一臉尷尬，話聽咗好多意見，有人話點衰都衰唔過舊年，照求可也；有人叫佢去祈福，唔好求籤；更有人要佢唔理點，都要求番支上籤返嚟。不過唔去嘅決定，最主要都係因為個女要佢陪。
但車公咁靈，點解唔去問多次吉凶呢？何志平惟有死撐，話求籤係趣味性，你話佢靈又得，唔靈又得，只有參考作用，原本係出於入鄉隨俗嘅雅興，但𠵱家市民嘅注意力咁集中，已經超乎求籤嘅習俗雅興應有嘅範圍喎！
（圖）何志平舊年玩求籤衰咗，今年學精改玩親民，見到細路就嗱嗱臨行前合照。
曾顯華攝
傳真︰2623-9278
電郵︰