阿董潛水多日，近幾日以來，香港人重以為蕭蔚雲做咗香港代理特首，白頭蕭咆哮完畢，北上過年，就輪到阿董神秘蒲頭，突然喺羅湖現身，聲稱參觀羅湖管制站嘅人流狀況，順便視察吓啲沙士禽流感有冇隨住自由行而大舉南侵。
阿董見到記者，又係嗰三幅被，執白頭蕭口水尾，話香港經濟復甦「勢頭好好」，講到政制改革，顧左右而言他，話政府會檢討，所以委任咗煲呔曾三人小組加緊工作咁話。
阿董蒲頭，相信最撞火嘅就係中央。呢兩日民意調查，白頭蕭來香港指手畫腳，咆哮訓話，香港人對中央人民政府嘅滿意度即時下降，反為阿董隱咗形，香港人見唔到佢個樣，有少少念舊，阿董嘅民望反為「吱」（有個T嘅尾音）高咗啲啲喎。
阿董呢次做快閃黨，閃得鬼咁靚。政制檢討，下就推咗個煲呔出嚟做炮灰，上就讓位畀蕭蔚雲出嚟做大奸角單人騷，成功令到香港嘅民意，向北面洩洪，果如八方所料，胡溫做正醜人。
中央人民政府俾阿董害得慘。皆因連《華盛頓郵報》都就住香港政制發表權威社論，矛頭直指胡錦濤，點名阿老胡，話佢先至係決定香港政制發展嘅關鍵人物，唔怪得英美領導高官，紛紛高調講話，紛紛發揚國際道義，支持港人普選，原來係美國準備用香港○七普選呢件事，考番胡錦濤牌，睇吓阿老胡，有冇誠意真係「以民為本」，逐步放棄專制，加入國際文明社會。
胡溫本來都重喺度做緊人情味豐富嘅文藝倫理劇，同愛滋病人握手，又滿眶熱淚咁吟誦新詩，又話統治國家，要真誠、真摯、真實，要聽多啲人民嘅心聲。好嘞，失驚無神俾香港呢鑊○七普選嘅事件殺到埋身，被迫要倉促表態，突然間收起淚光，黑起塊面，對住香港人嗌「唔准以民為本，唔准還政於民」，咁你叫我哋胡溫喺國際上點樣有面再見人？
連帶亦累到親中嘅民建聯都散埋。初初重話支持○七普選，又話要開圓桌會議，人人以為民建聯喺北京有線，準備上一鋪靚牌，白頭蕭突然殺來香港大反枱，搞到民建聯保皇唔係，反中又冇膽，死撐支持○七普選，就變咗搞港獨背叛祖國，縮沙反普選咩，今年九月立法會就唔使玩。冚世界都俾阿董害到雞毛鴨血。做奴才，就係咁痛苦嘅嘞，你話胡溫睇見阿董又出嚟做騷，係咪眼火標吖。
傳真︰2623-9278
電郵︰