轉會市場嘅大豪客車路士，終於出手，據報呢支英超聯已經同法甲聯雷恩嘅捷克𡃁仔國腳門將施亞達成協議，季尾之後以九百萬鎊（約一億二千七百萬港元）羅致佢。
不過，我求大俠就唔係好認同車仔今次嘅做法。因為首先，佢哋嘅正選門將古迪仙尼其實打得唔差，隔山買牛咁羅致施亞，有可能貨不對辦；而且，就算車仔嘅油王班主阿巴莫域治點有錢都好，用九百萬鎊去買一個門將，又真係貴咗啲！
我求大俠最怕嘅就係好似法國嘅馬賽咁，佢哋今屆本來一直都踢得好好嘅，點知傳出要借用曼聯門將巴夫斯之後，就成隊跌晒watt，特別係後防，重狂失波㖭！如果車仔真係不幸出現咁嘅情況，相信前列嘅曼聯同埋阿仙奴，都一定掩住嘴偷笑。
意大利球證哥連拿將會喺○五年初「封哨」，因為到時佢已經四十五歲，根據條例係唔可以繼續執法。不過佢就好唔捨得咁，重話巴治奧同索夫踢到咁老重有表現確係難得。周不時做最佳球證，又執法過大型國際賽決賽，咁殿堂級真係無憾。光頭球證，我求大俠向你致敬！
歐洲頂級聯賽教練難撈，除咗西甲薩拉戈薩炒咗科利斯外，榜末梅西亞亦踢走比路，改用威爾斯老牌教頭陶錫，呢個教練以前曾教皇馬、拉科、皇蘇同威爾斯國家隊，成績唔見得太好，去年一月更加俾意乙卡坦尼亞炒埋，教到咁嘅款，梅西亞請咗呢個名牌唔代表有得救㗎！
啱啱由保頓外借到安科納嘅前歐洲金靴獎射手查度，果然係儍儍哋嘅。周日喺球隊對佩魯賈嘅聯賽前，查度走出球場諗住向安隊球迷致敬；點知佢向住嗰班竟然係佩魯賈嘅球迷，安隊高層即刻好似捉癲佬咁捉番佢埋場邊。真係未為球隊建奇功，已經先淪為敵對球會笑柄囉！
喺足球場上，「機會主義者」未必一定係話前鋒，形容龍門都得。英格蘭丙組球隊伊奧維喺球隊月初足總盃對利物浦時，門將韋爾好識得趁對手名氣大，左飛右撲大打身價波。最近終於吸引到甲組韋斯咸搵佢試腳，隨時頂上占士個位，名利都有望幾級跳升，呢啲就真係識把握機會嘞！