去年香港飽受沙士困擾，而張國榮、林振強和梅艷芳又先後逝世，令香港陷入一片愁雲慘霧，十年前光榮引退的許冠傑為鼓勵香港人，近日破例開金口，親自創作《04祝福你》一曲，帶領梁詠琪和楊千嬅等一班後輩祝福港人新一年道別愁緒。
現年五十四歲的「歌神」許冠傑（Sam），自九三年在廣州舉行《許冠傑廣州光榮引退演唱會》後，便正式退出樂壇。而九九年阿Sam為舞台劇《仲夏夜狂想曲》擔任監製，及於○○年接拍電影《大贏家》後，阿Sam更從此絕迹娛樂圈，過着優哉游哉的退休生活。
但阿Sam有見去年香港飽受沙士困擾，而跟他感情不俗的張國榮又跳樓輕生，加上對樂壇貢獻良多的著名填詞人林振強與一代樂壇天后梅艷芳又先後病逝，不如意事接二連三，令他心情十分傷痛。
為寄望○四年的香港能邁向美好前景，阿Sam決定破戒再次涉足樂壇，親自寫了一曲《04祝福你》給全港市民，希望憑歌寄意，鼓勵港人不再憂鬱垂淚，平復心情再尋生存樂趣，並繼續懷着信心，勇敢地面對新的轉機。
而阿Sam今次不但親自為《04祝福你》作曲及填詞，更與一班樂壇後輩包括梁詠琪、楊千嬅、古巨基、梁漢文、何韻詩及Cookies一起合唱，對阿Sam的忠實fans而言，無疑是一大喜訊。而阿Sam這首新歌由EMI製作，前日已派往電台。
記者昨日致電EMI發言人葉鏡球了解阿Sam再開金口一事時，他說：「大概兩個星期前，我突然接到阿Sam嘅電話，佢話作咗首歌想送畀香港人，因為舊年香港實在發生咗好多好唔開心嘅事，又沙士，哥哥、林振強同阿梅又唔喺度，令到阿Sam心情好沉重。其實阿Sam退休之後一路都有作曲自娛，佢見舊年發生咁多事，就話不如送首歌畀香港人，祝福大家喺新一年遠離一切唔開心嘅嘢，希望香港人齊心邁向美好新一天。」
葉鏡球又表示，原本阿Sam只負責作曲及填詞，而歌曲則交由一班後輩主唱，但最後阿Sam亦改變初衷，主唱《04祝福你》第一句之餘，更親往監督錄音及製作。問到阿Sam會否再出唱片時，葉鏡球坦言不會，他說：「阿Sam純粹希望將呢首歌送畀香港人，唔係復出樂壇，亦冇諗過作乜嘢商業用途，所以佢唔會做任何宣傳工作。而呢首歌製作時間好趕，阿Sam兩個星期前通知我哋，跟住我哋即刻用咗一個星期通宵製作，噚日（前日）一搞掂就派咗上電台，所以我哋重未諗首歌會以乜嘢形式推出。」
採訪：戴彩煥
