今年樓價估計會穩步上升少少，不但白頭蕭見到崇光門口咁多人，話香港經濟復甦，連電影界領導人吳思遠都話，今年開拍嘅港產片較去年多五成，需求大量編導、攝影、燈光道具人才。
邊有咁多人手呢？舞台劇導演高志森近日話畀八方知：鬼咩，近幾年市道咁差，電影從業員，個個都轉晒行揸的士、開茶餐廳，或者北上經營骨場，一時間吹雞，都Call唔番班馬騮咯。
不過，高導演話，舞台劇就唔同，有班忠實擁躉，一台劇可以追十幾次，台上演員做戲，佢哋喺下面背台詞，所以編咯。編劇杜國威夠膽扒逆水，二月底三月初，連推出兩台話劇：《100%激流女程》同埋《石塘嘴如花與大舊勝》，屬於小品之作，脆脆哋會吓啲舊雨新知，話若果太耐冇作品，班觀眾會嬲咁講。
做舞台劇，反而入咗個避風塘，杜國威同高志森醒目，及早轉型，若然呢個政府好似佢兩個咁識執生，香港就一早有咗出路嘞。
傳真︰2623-9278
電郵︰