喺中國天文玄學中，每年都有太歲神與唔同生肖出生嘅人相沖，亦即犯太歲；對於車主嚟講，犯太歲可能會招致血光之災，或其他不必要嘅道路意外。而喺玄學角度嚟睇，汽車係車主嘅隨身物品，就如一間屋和衣服一樣，顏色或號碼不配，會直接影響車主新一年嘅運程。今次我們除咗請來玄學家方海閱師傅，同大家講吓唔同生肖嘅車主，喺猴年嘅催旺運氣方法外，另外更罕有地刊出各種可用於汽車上嘅平安符，以及其使用方法。希望各車主能在新一年路路平安，路路暢通。
記者、攝影：李子佳
玄學家方海閱師傅表示，按五行算數相生相旺嘅原理，唔同生肖嘅車主，可利用車身顏色同車牌數字嘅配搭，來催旺自己嘅運氣。若你今年打算買新車的話，不妨留意下表所列各生肖與汽車顏色嘅配對噃！
車牌亦係一個最好催旺運氣嘅辦法，2004年踏入八運艮卦，當令號碼係8，其次係6、1。方海閱師傅表示，喺一般情況下，車牌號碼唔會令車主運情太過差，相反擁有當旺嘅號碼，可以將車主嘅運程催旺。8字係最佳嘅選擇，而8、6、1呢三個數字不需連埋一齊用，若車牌號碼中只有其中一個，就相當足夠；當然如果車牌內有齊8、6、1三個字咁就最好啦！重有就係數字嘅排列亦無所謂。
方海閱師傅又指出，雖然唔同顏色嘅汽車，可以催旺唔同生肖嘅車主，但如果車主本身已擁有汽車，而又未能翻噴顏色的話，其實可以喺車廂內放置唔同嘅小飾物，以催旺自己嘅運程，同時亦有化煞功能。而木質小葫蘆就係最普遍嘅車廂吉祥飾物，不論屬哪一個生肖嘅車主，都可掛木質小葫蘆於車廂中，皆因葫蘆屬性溫和，可適合唔同生肖嘅車主。
車廂平安吉祥飾物：
屬馬、蛇：呢兩個生肖嘅人五行屬火，可用綠色或木質嘅小葫蘆作催運飾物。
屬虎、兔：虎、兔嘅車主五行屬性係木，催運飾物分別係藍色、黑色或白色嘅飾物，例如白水晶等，因白水晶有助清醒頭腦，令車主可以最佳情況下駕駛。
屬豬、鼠：呢兩個生肖嘅車主五行屬性係水，催運飾物包括金色嘅飾物、金屬做嘅飾物，例如黃金財神飾物等等。
屬猴、雞：呢啲車主嘅五行屬性係金，催運飾物係土質嘅物件，同埋啡色、黃色嘅飾物，例如玉觀音、黃水晶等等。
屬羊、狗、牛、龍：佢哋五行屬土，催運飾物為紅色、紫色及粉紅色嘅飾物，例如粉紅、紫水晶等。
除可以顏色及車牌號碼催旺自己嘅運氣外，大家更可向玄學家求一啲平安符、招財符等等，從而令新一年大吉大利；有興趣嘅你，不妨留意一下噃！
肖虎車主沖太歲
2004年猴年正是甲申太歲，他名叫方傑；而今年將有四個生肖犯太歲，當中包括猴犯刑、虎犯沖、蛇犯破、馬犯害。
其中屬虎嘅車主犯沖太歲，而姓名中有方或木（與他名字相沖）嘅車主，亦可能會有血光之災。傳統一點嘅車主，可用化太歲符摺成三角形，掛或藏於車內。方海閱師傅表示，化太歲符適合猴年犯太歲嘅車主，例如生肖屬猴、虎、蛇及豬嘅人士。使用方法係將太歲符摺成三角形隨身攜帶，或收藏在銀包或手袋之內；如果車位係向西南方的話，除避免用車頭直指外，若避無可避的話，一定要將太歲符掛在車頭方可化解。
職業司機要用五路招財符
五路招財使者係武財神趙玄壇麾下嘅招財猛將神兵，「五路招財符」嘅功能係分兵成「東、南、西、北、中」五方五路為善信招正財、橫財及偏財，適合職業司機。使用方法係將符摺藏於利是封內，然後再放響車上或掛在車頭。首次使用時，須連同8張元寶及8張壽金在車外焚燒，然後將符摺成三角形放在車內便可。
家庭七人車專用和合人緣符
和合人緣符係指和諧、和睦、和氣，和順等，增加人際關係如親人、同事、客人、朋友及群眾等；呢種符適合家庭七人車，又或者係公司用以接載賓客嘅車輛使用，使用方法係將符摺藏於利是封，再放在車廂內或掛在車頭。首次使用此符時，須將符連同9張元寶及9張壽金，在車外焚燒。
媾女戰車專用和合情緣符
單身嘅車主可用和合情緣符，目的係增加愛情、感情嘅緣份。和合情緣符可將異性緣之距離拉近，從而改善各方面嘅情緣運。使用方法係將符焚燒，放於水內，再用小樽將之載着封密，並放在車上。
護身平安靈符保安全
平安靈符有保佑個人平安嘅功能，可避過飛來橫禍之凶災，或將宿命帶來嘅劫數化險為夷；選擇使用方法係將此符摺成三角形，掛或貼在車廂內嘅車頭擋風玻璃之上。
若想剛購入嘅二手車為你帶來好運的話，可先用碌柚葉（辟除衰氣）加柏葉（寓意安康）浸水，潔淨車身內外，喺沖洗時要順時針方向抹（寓意順頭順路），並意想將車身上嘅衰氣一一沖走。
許願時手執五支香向天誠心禱告（祈語：焚香拜請五方五路神明開路，保佑善信×××駕駛此車編號為××××，一切百無禁忌，人車平安，順頭順路，萬事大吉大利。）；順時針向東、南、西、北、中（車）方叩拜，焚燒元寶、壽金、消災百解、平安貴人等等，最後奠酒便可。
