地產市道復甦，大部份地產股都生晒，大大隻嘅藍籌地產一早已經升到阿媽都唔認得，噚日連細細隻嘅漢國置業（160）同建業實業（216）都突然急升。
經紀陳話，連滙漢（214）、泛海集團（129）同泛海酒店（292）呢系股票都升埋，可見家陣個市真係夠晒熱鬧，泛海系股票近排開始見到熱身，暫時滙漢似係主角，皆因成交以佢最多，噚日最高升至3.35元，收3.25元，成交股數有210萬股，金額680萬元。
如果經紀陳唔講起，真係唔知滙漢股價已經創52周新高。至於泛海噚日亦升5%，收0.42元，泛海酒店則升3.7%，收0.28元。
經紀陳又話，呢系股票無端端炒起，除咗受惠於樓市復甦之外，市場亦傳聞滙漢想伸手抽水。
其實家陣隻隻地產股都有抽水誘因，呢類傳聞小初完全唔感到意外。不過，滙漢早兩年在科網股熱潮時，趁勢變身抽完水後，股價即刻跌到阿媽都唔認得，至今記憶猶新，不過今時環境已經唔同。
慕容小初