藍籌與國企噚日齊齊大升，恒指升破13500，收13570，升幅2.4%。市場無視美林預期國企指數將調整至4000水平的警告，國企指數勁升3.6%，收4905，再挑戰5000關。今年大部份股民都可以過肥年，唔使再做羊牯。
中國去年經濟增長9.1%，創97年以來最高速的增長紀錄，雖然市場預期中國經濟會稍為放緩，但國內仍預期今年的經濟增長，保持在7%以上，通脹亦預期保持在低水平，外資毋須過份憂慮國內經濟過熱。換言之，猴年炒港股，又少一個風險。
豊采多媒體（764）噚日出現一手大成交上版，股數高達1150萬股，每股作價3.20元，涉資3680萬元，據聞是有主要股東出貨，不過只係賣畀圍內人。黑客話可能有景轟，豊采早前借申請在獅城第二板上市消息，由3元抽上3.50元水平，然後有大手股份上板，睇個勢應該重有後着，可惜成交仍然偏小，需要等成交配合，才有發圍機會。公司在上半年，可望落實在國內向電視台提供節目，相信呢個概念可以炒番轉。
香港飲食（668）獲主席以每股77仙提出全購後，股價一直在80-90仙水平徘徊，由於收購價較市價有折讓，主席難以藉此增持香港飲食至控制性股權，唔排除完成收購後，主席會再出招增持，不過暫時唔知會出邊招，如用供股方式就比較麻煩。
本地消費復甦，飲食業又旺番，加埋主席想增持，如果唔係因為成交稀疏，以及冇人睇住維持秩序，此股應該可以跟莎莎（178）及Joyce（647）呢類消費零售股一齊炒。
阿 虎