羊年尾二交易日，港股大升，升幅超過20%嘅窩輪，超過50件，好友皆大歡喜。地產股同電訊股Call輪，意氣風發。高追唔係個個夠膽，唔想太搏殺，可以諗吓啲銀行Call輪。
恒指創新高，滙豐（005）雖然亦升1.5元，收123.50元，但比起前周127元高位，仍有3.50元距離，揸滙豐Call輪，相對風險細啲，當然如果啲地產股同電訊股再去，滙豐Call輪表現會相對失色啲。滙豐Call輪對象有9274、9182、9136。9274五月到期，輪價78仙，溢價1.9%，槓桿率15.8倍。9182六月到期，輪價94仙，溢價2.3%，槓桿率13.1倍。9136四月到期，輪價1.46元，負溢價0.7%，槓桿率8.5倍，呢件爆炸力弱過前面兩件，風險自然低啲。
呢個回合嘅升市，恒生（011）亦係脫腳股，搵輪炒，主角係9162，4月到期，輪價56仙，溢價1.5%，槓桿率18.6倍。搏殺格，則揀9229，四月夠鐘，輪價49仙，溢價2.8%，槓桿率21.2倍。中銀（2388）收14.60元，升30仙，搵輪短炒，唔理數據，揀成交多嘅埋手，最靚嘅係9218，9月到期，輪價20.5仙，溢價9.1%，槓桿率7.1倍。
章 盛