樓市好景，發展商賣到樓當然高興，代理行亦受惠，生意大增，美聯物業噚日就發放特別獎金同特別花紅畀後勤員工，最多有兩個月糧。連埋舊年嘅1個月花紅同基本人工，即係話最多可以有15個月糧，難怪美記後勤同事噚日個個都心情靚靚啦！
美聯集團主席黃建業重同一班管理層，對內發布好消息之餘，亦提早同大家拜年，佢重話為咗滿足在港度歲同新年睇樓或偷步入市嘅買家，年初一、二旗下122間分行會繼續營業。
另外，對手中原地產董事總經理黃偉雄話，今個月頭3個禮拜，佣金已突破1億元，董事局決定喺4月派發不少於半個月糧畀後勤做花紅。主席施永青更呼籲滙豐及公用事業等大公司帶頭加人工，並謂主不肯加薪，最終可能因小失大。
舊年沙士期間代理至叫晒救命，要削分行減人工，搞到成行都好悲觀，估唔到幾個月後市況完全變晒，真係有啲令人難以置信。
農曆新年將至，恒基張炳強噚日興高采烈咁話，希望猴年可以行桃花運，重即場向隔離嘅中原九龍區董事劉瑛琳索吻，年廿九率先實現新年願望。
中原啱啱攞咗恒基嘅銷售大獎，劉瑛琳爽快咁話要回贈香吻，不過親吻就欠奉，只係用唇膏喺當勞（張炳強洋名）面上畫咗個香豔嘅唇印，行桃花運嘅願望都算實現咗一半。
一不離二，美聯下晝開東涌海堤灣畔記招，當勞興之所致，又向新世界何太索吻，不過食咗檸檬。
雖然當勞出名頑皮，但佢話猴年最希望大家身體健康，事關身體好先至可以努力實現其他願望，所以再祝大家心想事成喎！
長實嘅北京東方廣場商場──「東方新天地」，不斷搞新意思吸引租客同消費者，最近就喺商場闢咗一個「尊萃時光別館」，專賣頂級鐘表同珠寶，其中租客之一瑞士Omega承租嘅店舖，面積重係中港區最大。日前呢間舖開幕，Omega形象大使任齊賢同藝人楊紫瓊都有出席。
護膚品名牌SKII亦喺同場開設中國首家BeautyAcademy，日前開幕，請咗名模琦琦擔任主禮嘉賓。聽講長實有意今年將「東方新天地」嘅租金調高兩成，個別旺舖加幅重高達五成㖭。
近排中原主席施永青頻頻出手買嘢，啱啱用咗千八萬掃咗何文田嘉多利豪園3伙，噚晚周年晚會又自爆，再斥資四千幾萬買入中環甲級商廈。
雖然施老闆冇話買咗邊幢寫字樓單位，又唔肯講買嚟投資定自用，但小道消息指出，施老闆買嘅係日前呎價創新高嘅皇后大道中九號30樓單位，面積6792呎。
以成交價4686.5萬蚊計，呎價高達6900蚊。
聽日就係大年初一，送羊迎猴之際，唔少行內人都分享吓猴年投資心得。
近期掃咗唔少貨嘅美聯主席黃建業就話，市道差嘅時候，投資策略係揸多啲現金；𠵱家市況轉好就適宜買樓，揸少量現金同債券。新世界嘅何伍燕榆，同樣睇好今年樓市，都係着重物業投資。
恒基張炳強就與別不同，佢話猴年嘅投資心得係放多啲時間投資喺社會公益事務上，例如做義工，回饋吓社會，希望最少放5至10%時間做公益事務。
以一年365日計，咪即係要做18至36日義工！
蘭西
電郵地址：
