余文樂噚日凌晨喺灣仔波斯富街一幢大樓拍新片《英雄無用》，阿樂同陳冠希做對手戲，點知拍拍吓，佢忽然覺得好頭暈，兼夾四肢冇力，工作人員驚佢有事，於是就嗱嗱臨打九九九叫救護車，送咗阿樂去律敦治醫院，經過醫生檢查後，就話佢只係普通感冒，佢喺醫院休息一陣，凌晨三點左右就戴住個口罩，坐住輪椅咁出院。
我馮仁昭噚日就打電話問候過佢，阿樂話：「今日唔使開工可以留喺屋企休息吓，其實我一個月前開始患感冒，一直未清晒，加上啲工作未停過，根本冇好好休息過，所以噚晚拍拍吓嘢個頭好暈，工作人員先會打九九九送我入院，醫生幫我檢查晒，話普通感冒未清，又缺乏休息啫！所以好快已經畀我出院。」其實乜都係假，最緊要就係病向淺中醫，同埋多啲休息，唔係病住過年就唔好啦！
鄧兆尊得閒都鍾意打桌球，噚日凌晨三點幾，佢同細佬兆榮同埋兆榮女友等三男一女，一齊喺灣仔東亞桌球城出嚟，齊齊上咗鄧兆尊架車，之後就全部去晒永祥大廈。馮仁昭聽講兆尊打桌球都幾叻，睇佢打波打到三更半夜，唔知贏咗幾多盤呢？
林嘉欣早排喺內地拍咗個服裝品牌廣告，雖然嘉欣係攝影師拍攝嘅對象，但係佢一唔使埋位，就攞住部相機周圍影人，自己做埋攝影師，連髮型師同化妝師都俾嘉欣影咗唔少相，最慘係人哋幫嘉欣整緊頭髮、化緊妝嗰陣，嘉欣都不停咁影嚟影去，搞到人哋好無奈囉。
李珊珊嘅男友錢嘉樂最近喺匡湖居置業，但日前有雜誌記者擅自進入影相，報道重話佢哋今年結婚，珊珊對呢件事好不滿，佢噚日喺電話度話：「一定唔係今年結婚，我哋高興咪一齊住吓，不過我好唔滿意點解記者可以擅自闖入民居，係咪身為公眾人物就乜嘢都要向公眾交代，咁樣好冇安全感。」
吳鎮宇噚日喺港台出席「開心日報─香港中產階級猴年十大願望」，佢從十個願望中揀咗希望政府可以回應民意，鎮宇話：「因為郵差冇理由唔派信，好同唔好，政府都一定要回應。」佢表示今年會向幕後發展，遲啲會開套以警察做題材嘅戲，不過未定做導演定係監製。睇嚟鎮宇對於做導演嘅熱情，都冇因為之前嘅作品成績差而減退喎！
