羊年經濟由低谷回升，上半年雖然一片愁雲慘霧，但下半年就大翻身，強勁復甦，四周一片上升之聲，股市升、樓市升、金市升、外幣升（美元唔計）；臨近歲晚，失業率下跌，大公司重話要大量請人，未來一年，前景肯定好樂觀。今日大除夕，送羊迎猴，同各位拜個早年，祝大家投資順手、萬事勝意、身體健康。
港股又再發威，恒指大升317點，再創今年升浪新高，今日半日市，重係要繼續加碼，因為芬佬已話到明，踏入猴年，股市重會更好景，恒指升到14000點，已經係好保守估計，今年首季見15000點，唔算奢望；而美林重樂觀，話恒指今年會「掂」到16000點㖭！
公司集資發展，喺低息期同銀行借錢最着數。通常做得成銀團貸款嘅公司，股價都會上升，理由好簡單，就係銀行做得咁大個deal，肯定將成間公司由頭到尾驗到一清二楚冇病冇痛，先會落實。投資落呢啲有「健康證明」嘅公司，都會放心啲。呢一兩日，就有兩家中型公司攞到以億元計嘅大loan，分別係佑威（627）同高寶（274），兩者股價都上升，前者升4.7%，後者升4.5%。佑威早輪推介過，今日講高寶。
呢個浪，恒指升咗63%，好多股票升幅更以倍計，但過去半年，高寶就原地踏步，大部份時間在1.3元至1.45元間上落，可說大落後。高寶PE唔高，股價呆定，主要係公司發展迅速，市場憂慮會伸手抽水，無論配股或供股，都對股價不利，所以令投資者窒步。其實，高寶在去年5月已做過配售，家下手上有現金成4億元，再加上今次做埋銀團貸款，集資壓力可說一掃而空。
重有，高寶投資嘅金迪已安排下月在新加坡上市，消息傳來，IPO認購超額逾百倍，高寶出售股權，既可套現，又可獲厚利。
03年度（12月止）的上半年，高寶獲利9179萬元，保守估計全年賺1.8億元，每股盈利（加權計）25仙，PE7倍，股價已可見1.75元。04年度，盈利料可上升至2.5億元，PE更低！
早輪提過隻銀建國際（171），在2.0元水平已有消息話要再翻一番，噚日上足油開車，高收2.6元，聽講好快會見3字頭，過完年之後，聽聞重會不斷有大動作，好消息陸續有來。
郭兆誠