今年賀歲波外隊唔係咁吸引，至今兩日比賽只係賣出九千幾張門票。凄風冷雨更加影響入場意欲。不過，根據經驗，冇球星壓陣嘅國家隊會打得更悅目；臨場買張飛捧主隊場及感受現場氣氛，都值回票價啦！
雖然挪威今年冇乜大牌球星壓陣，但實力絕對唔可以睇小。三支外隊中，就以挪威操練最討好，球員態度認真，分隊賽當真咁踢，腳腳七注；加上技術出眾，射門又勁又準，呢支由名教練夏萊德帶領嘅球隊相信會係今屆奪標大熱。
賀歲波聽日就開波，而賽會噚日就忙於響大球場掛廣告同贊助商旗幟；而大球場已經成個月冇比賽，三樓看台就更加係自從皇馬對港隊後首次開放，賽會噚朝就安排工作人員抹乾淨每張封晒塵嘅椅。